Хялганат- Хангал чиглэлийн 10 км хатуу хучилттай замын ажил дуусч, ашиглалтад орсон байна. Тус замыг улсын төсвийн хөрөнгө оруулалтаар “Увт инвест” ХХК, “Ди Вай Кэй Би” ХХК-ийн түншлэл гүйцэтгэгчээр нь ажиллаж, өдөр тутмын техник технологийн хяналтын зөвлөхөөр Зам, тээврийн хөгжлийн төв ТӨҮГ ажилласан байна.
Хялганат- Хангал чиглэлийн авто замыг ашиглалтад оруулснаар бүс нутгийн аялал жуулчлалыг хөгжүүлж, Булган аймгийн Хангал сум, Хялганат тосгоны иргэд аюулгүй, тав тухтай зорчих боломж бүрджээ.
Дашрамд дуулгахад манай улсын 330 сумын 107 нь нийслэлтэй хатуу хучилттай авто замаар холбогдсон байдаг аж. Энэ онд 40 сумыг хатуу хучилттай авто замаар холбох ажил хийгдэнэ гэж Зам, тээврийн хөгжлийн төв ТӨҮГ-ын захирал Х.Пүрэвжаргал нэгэн ярилцлагандаа хэлсэн байсан.
Тодруулбал 2024 оныг Бүсчилсэн хөгжлийг дэмжих жил болгон зарласан. Үүнтэй уялдуулж, Зам, тээврийн хөгжлийн яамнаас Бүсчилсэн хөгжлийг дэмжих бүтээн байгуулалтын жил болгон зорилтоо тодорхойлсон аж.
Энэ онд бүх аймгийн төвүүдээ хооронд нь хатуу хучилттай авто замаар холбох “Мянганы замын хоёр дахь довтолгоо”-г эхлүүлсэн байна.
Тухайлбал, Хэнтийн Дадалаас Ховдын Булган, Дорнодын Халхголоос Баян-Өлгийн Цагааннуур хүртэл, Увс, Завхан, Хөвсгөл, Булган, Хэнтий, Дорнодоос БНХАУ руу, Говь-Алтай, Баянхонгор, Өмнөговь, Дорноговь, Сүхбаатараас ОХУ руу холбогдох авто замын долоон коридортой болно. Мөн “Шинэ сэргэлтийн таван цагариг” зорилтын хүрээнд Монгол Улс урд хойд хөрш Ази Европыг холбосон авто замын босоо-5, хэвтээ-2 коридортой болохоор ажлаа эрчимжүүлжээ.
2024 онд Улаангом-Ховд чиглэлийн 163 км, Улиастай-Алтай чиглэлийн 198 км авто замын барилгын ажил эхлэх юм байна.
