Манба Дацан хийдийн зурхайч, Анагаах ухааны магистр Д.Сайнсайхан “1992 оны усан бич жилтнүүд 33-ны мөчлөгийн заслаа хийлгэх нь чухал” хэмээлээ.
Тэрбээр “Жил өнгөрөх гэж байхад 33-ны мөчлөгийн заслаа хийгээгүй хэл ам, хэрэг зарганд орооцолдсон, амьдрал нь бараг муу тал руугаа хөмөрчих гээд байна гэсэн залуучууд ирдэг нь харамсалтай санагддаг. Тиймээс он гарахаас өмнө 1992 оны усан бич жилтнүүд 33-ны мөчлөгийн заслаа хийлгэж амжаагүй бол хийлгэн, ээжийгээ баярлуулаарай. Эрэгтэй хүн эхээсээ төрөхдөө гал, эмэгтэй хүн усан суудал дээр суудаг. 33-ны мөчлөг дээр төрөхөд анх суусан суудал дээрээ суудаг. Харин жил орж байсан мөчлөгүүдийг харахад эрэгтэй хүн 13 насан дээрээ ус, эмэгтэй нь гал дээр суудаг. Тэгэхээр суудлаа сэлгэх болон суудал дээрээ суух үед хатуу нөлөөлөлтэй байдаг. Энэ 33-ны мөчлөг буюу эхийн хий нь ясан махбод болон суудлын гүймигтэй давхцдаг.
33-ны мөчлөгийн талаар бид учир утгыг мэдэх, мэдэхгүй, итгэх, итгэхгүй дом засал арга гэж хийнэ гэж явахаар хүн өөрөө байгалийн, сэтгэлийн амьтан учраас тухайн жилийн эхээс төрөхөд суудаг суудлын гараг эрхэсийн нөлөөг арилган, суудлын гүймигийн заслаа сайн хийлгээд, ээжийнхээ ачийг санаж баярлуулаад, хариуд нь сайн сайхан ерөөл хэлүүлж, үнсүүлэх нь зөв гэж зөвлөдөг. Тэгж зөвлөхөөр хүмүүс их гайхдаг л даа. Ном асуух гэж ирсэн чинь ээжийгээ баярлуул гэж хэлдэг ямар сонин юм бэ гэдэг. Хүмүүс айдас, сэжиг ихтэй. 33-ны мөчлөг орох гэж байна, орж байна, заслаа хийлгэхгүй бол болохгүй гэнээ гээд ирдэг. Ажиглаад байхад энэ нь үнэний ортой харагддаг.
Бид эцэг, эхийгээ баярлуулах хамгийн том зүйл бол сайн явж, сайхан зөв амьдарч, бусдад тустай нэр бүтэн явах л гэж би боддог. Хөхүүл хүүхэдтэй эх хүн горьдчихоор ямар ч эмнэлэг, ямар ч мундаг ном горьдоог нь гаргаж дийлдэггүй. Харин горьдоог нь гаргасан хойно сэтгэлзүйн хувьд сайхан болоод хөх нь чинэрч зовиурлаж байсан маш хүнд эмгэг нь эдгэчихдэг. Энэ сонин хэрэг шүү. Үүнийг одоо болтол шинжлэх ухаан тайлбарлаагүй байна. Түүнтэй адил ээжийгээ баярлуулж чадвал илүү сайн. Энэ бол том нөлөөг засах засал юм.
Түүнчлэн 33-ны мөчлөг нь энэ жил 1993 онд төрсөн Усан тахиа жилтэй эрэгтэй, эмэгтэй хүмүүст тохиож байгаа. Энэ хүмүүс бусад засал номоо хийлгэхээс гадна энэхүү 33 мөчлөгт хамаарах суудлын гүймигийн заслыг анхаарч хийлгэж, ээжийгээ л баярлуулаарай” хэмээлээ.
ГҮЙМИГ БУЮУ ЕСӨН НҮДНИЙ ЗАСЛЫН ТУХАЙ
Насны болон суудлын, ясан махбодийн гэсэн гурван төрлийн гүймиг байна. Энэ могой жилд Тахиа жилтэй хүмүүс ясан махбодын гүймиг таарч байгаа учраас гүймэг засал хийлгэнэ.
Есөн насны мөчлөгтэй билгийн насаар 9, 18, 27, 36, 45, 54, 63 гэх мэтчилэн насанд насны гүймигийн заслыг хийлгэх ёстой.
Түүнчлэн 2017 оны Гал тахиа, 1945 оны Модон тахиа жилтэн 9, 81 гүймэгийн засалд амь насны хорлолыг засахын тухайд цэвэгмэдийн чого, манал болон дарь эхийн чивэл уншуулна.
2008 оны Шороон хулгана, 1990 оны төмөр морь, 1972 оны усан хулгана жилтэн 18, 36, 45 насны гүймэгийн засалд эд баялагийн гарзыг хаахын тухайд Дашчаревын сан, даллага уншуулна.
1999 оны Шороон туулай, 1954 оны модон морь жилтэн 27, 72 насны гүймигийн засалд гадны хорлол ад дон муу шалтгаанаас хамгаалж Сахиусны ганшиг, Зандой уншуулна.
1981 оны төмөр тахиа, 1963 оны усан туулай жилтэн 45, 63 насны гүймигийн засалд муу гаслан зовлон гарахаас сэргийлж, Сундуй уншуулахаас гадна 9 нүхтэй төмрөөр гүймиг засал хийлгэвэл маш сайн.
Суудлын гүймиг гэдэг нь эрэгтэй хүн галд, эмэгтэй хүн усан суудал дээр сууж байгаа энэ мөчлөгийг хэлж байгаа учраас мөн адил 9 нүхтэй төмрөөр гүймэг засал хийлгэнэ.
