.
Ozempic, Wegovy, Maunjaro зэрэг тарилга нь 2-р хэлбэрийн чихрийн шижин өвчтэй хүмүүс болон таргалалттай хүмүүст зориулсан цусан дахь сахарын хэмжээг хянах, жингээ хасахад туслах зорилготой тарилга юм.
Гэвч гоо сайхны салонууд, “хуурамч” онлайн эмийн сангууд болон сошиал медиа хэрэглэгчид эдгээр тарилгыг суртчилж байгаа нь ийм төрлийн тарилгын хэрэглээг нэмэгдүүлж байгааг Их Британийн эрүүл мэндийн салбарынхан мэдэгдсэн байна.
Сүүлийн үед Монголд борлуулагдаж байгаа ихэнх тарилгууд Монгол улсын эмийн бүртгэлд бүртгэгдээгүй, хувь хүмүүс ашиг олох зорилгоор борлуулж байгаа нь харамсалтай. Эдгээр тарилгыг эмчийн жороор тухайн хүнд тохирсон тунгаар хэрэглэх ёстой бөгөөд тун хэтрүүлбэл амь насанд ч аюултай юм. Тунг хэтрүүлсэн тохиолдолд цусан дахь сахарын хэмжээ хэт бууж, зүрх дэлсэх, гипогликемийн шок гэх мэт хүндрэлүүд үүсгэдэг байна.
2023 оноос хуурамч тарилгууд жоргүйгээр зах зээлд маш их борлуулагдаж байгаа нь хэрэглэгчийн эрүүл мэндэд аюултай үр дүн авчрах магадлал их байгааг эрүүл мэндийн салбарынхан сануулсаар байна. Хуурамч тарилгууд таталт өгөх, ухаан алдах зэрэг сөрөг нөлөө үзүүлж байгааг мэргэжилтнүүд дурджээ.
Их Британийн эрүүл мэндийн ажилтнууд 2023 он гарснаас хойш улсын хэмжээнд тураах үйлчилгээтэй 600 гаруй хуурамч тарилгыг хурааж авсан гэсэн тоо баримт байна. Монголд ч бас эдгээр тарилгыг хувь хүмүүс нууцаар оруулж ирж жоргүйгээр борлуулж байгаа нь хууль зөрчсөн ашгийн төлөө ажил юм.
