Өнгөрсөн жил Гиннесийн амжилтын дээд амжилтын эзэн болсон Томико Итоока 12-р сарын 29-нд Японы төв хэсэгт орших Хёго мужийн Ашия дахь асрамжийн газарт таалал төгслөө. Өнгөрсөн жил 117 настай Мария Бранясыг нас барсны дараа Итоока дэлхийн хамгийн өндөр настай эмэгтэйгээр нэрлэгдэж байсан.
Гадил жимс болон калпис хэмээх сүүн ундаанд дуртай хэмээн сэтгүүлчдэд өгүүлж байсан Итоока дэлхийн нэгдүгээр дайн эхлэхээс зургаан жилийн өмнө буюу 1908 оны тавдугаар сарын 23-нд Осака хотод мэндэлжээ.
Дунд сургуульд байхдаа волейбол тоглодог байсан Итоока хожим ууланд авирах сонирхолтой болж 3067 метр өндөр Онтаке уулын оргилд хоёр ч удаа амжилттай гарч байсан аж. Тэрээр 20 настайдаа гэрлэж, дэлхийн хоёрдугаар дайны үед нөхрийнхөө нэхмэлийн үйлдвэрийг удирдаж байжээ. Нөхөр нь 1979 онд нас барсны дараа Итоока Нара хотод ганцаараа амьдрах болжээ. Итоока хүү, охин, таван ач зээтэй бөгөөд оршуулах ёслолыг оны өмнө гэр бүлийн хүрээнд цомхон зохион байгуулсан тухай Японы Армад настны бодлого хариуцсан төв мэдээлсэн байна.
Итоока нас барснаар түүнээс 16 хоногоор дүү Бразилийн гэлэнмаа Ина Канабарро Лукас хамгийн өндөр настай хүнээр нэрлэгдэж байна.
