Баруун Европ тэр дундаа Франц, Бельги, Недарландын нутгаар сүүлийн 14 жил болоогүй их хүйтэн болж, их хэмжээний цас орсноос томоохон асуудал үүсээд байна. Нислэгүүд цуцлагдаж, хурдны зам дээр ачааны тэргүүд хөдөлгөөнгүй зогсч дагаад автозам дээр асуудал үүсчээ. Австри, Германд ч хүндрэлүүд үүссэн бөгөөд орон оронд ямар нэг байдлаар их цас, хүйтний улмаас хүмүүс амь насаа алдсан тохиолдлууд ч гарсан байна. Эхэндээ их цасанд хүмүүс баярлаж, цаны баазууд хөдөлгөөн ихтэй болж байсан ч одоо бол ийм төрлийн тэмцээн, аялал жуулчлалын газруудыг хааж эхэлсэн байна. Бусад төрлийн тэмцээнүүд ч цуцлагдаж эхэлжээ.
Австрид гэхэд аялал жуулчлалын жижиг тосгон зам харгуй нь очих боломжгүй болсноос 600 орчим хүн хорионд орсон аж. Германы агаарын гол сүлжээ болсон Мюнхений нисэх онгоцны буудал дээр гэхэд 760 гаруй нислэг цуцлагдсан байна. Мөн иргэдийг шаардлагагүй бол машин унахгүй байхыг зөвлөж байгаа бөгөөд гудамжинд мөстсөн зам дээр явганаар алхахад ч хэцүү байгаа гэнэ. Мюнхенд гэхэд 44 см цас орсон нь 1933 оноос хойш үзэгдээгүй үзүүлэлт аж.
