126 гишүүнтэй парламентын анхны намрын чуулган маргааш буюу аравдугаар сарын 1-ний 10:00 цагт нээлтээ хийнэ. Энэ удаагийн намрын чуулганаар Монгол Улсын 2025 оны төсвийн төсөл, Засгийн газрын үйл ажиллагааны төлөвлөгөө зэрэг асуудлуудыг хэлэлцэхээс гадна хамтарсан Засгийн газрын 14 мега төслийг 2025 онд багтаан эхлүүлэх асуудлыг хэлэлцэх юм.
Засгийн газарт хамтарсан намууд “Хурдтай хөгжлийн төлөөх зориг” хэмээх гэрээ байгуулсан. Үүнийхээ дагуу Засгийн газрынхаа 2024-2028 оны үйл ажиллагааны хөтөлбөрийг батлуулсан. Ингэхдээ Засгийн газар ирэх дөрвөн жилд 14 мега төслийг хэрэгжүүлэхээр зорьж байна.
Хамтарсан Засгийн газар ирэх дөрвөн жилийн хугацаанд дараах 14 мега төслийн ард нь гарахаар зорьж байгаа юм.
1.Үндэсний хиймэл дагуулын төсөл;
2.“Гашуунсухайт-Ганцмод”, “Ханги-Мандал”, “Шивээхүрэн-Сэхээ” хилийн боомтуудын хил дамнасан холболтын төмөр замын төсөл;
3.Тавантолгойн дулааны цахилгаан станцын төсөл;
4.Эрдэнэбүрэнгийн усан цахилгаан станцын төсөл;
5.Эгийн голын усан цахилгаан станцын төсөл;
6.Сэргээгдэх эрчим хүч ба тархмал эх үүсвэрийг хөгжүүлэх төсөл;
7.Хэрлэн-Тоонот, Орхон-Онги ус дамжуулах хоолойн төсөл;
8.Эрээнцав-Чойбалсан-Бичигт чиглэлийн босоо тэнхлэгийн төмөр замын төсөл;
9.Монгол, Францын хамтарсан Ураны төсөл;
10.Нүүрс-хими, Кокс-химийн цогцолборын төсөл;
11.Зэс боловсруулах цогцолборын төсөл;
12.Гангийн цогцолборын төсөл;
13.Газрын тос боловсруулах цогцолборын төсөл;
14.Алт цэвэршүүлэх үйлдвэрийн төсөл;
