Монгол Улсын нийслэл Улаанбаатар хотод снукер бильярдын 15 улааны Дэлхийн цомын анхдугаар тэмцээн 9 сарын 14-19-нд болж байна. 6 улааны Дэлхийн аварга шалгаруулах тэмцээн 9 сарын 21-25-нд болно.
Дэлхийн цомын тэмцээнд 20 орны 76 тамирчин, ДАШТ-д 20 орны 80 тамирчин өрсөлдөж байгаа бол манай улсаас дээрх хоёр тэмцээнд дасгалжуулагч Д.Амаржаргал, Б.Шинэбаярын удирдлага дор 16 тамирчин өрсөлдөж байгаа аж.
“Holiday Inn” зочид буудлын хоёрдугаар давхарт болж буй Дэлхийн цом, ДАШТ-ий шагналын нийт сан 60 мянган ам.доллар юм. Снукер бильярдын ДАШТ-ээс 2023 онд Монголын тамирчин Б.Нарантуяа хүрэл медаль хүртсэн. Мөн 2022 оны Азийн АШТ-ээс хүрэл медаль хүртэж байсан тухай Биеийн тамир, спортын улсын хороо мэдээллээ.
