Хэвлэлийн эрх чөлөөний өдрийг тохиолдуулан Хэвлэл мэдээллийн зөвлөл, “Мэдрэмжтэй мэдээлье” нэгдэл “Ёс зүйг хамтдаа амлая” уулзалтыг зохион байгууллаа.
Үгээ хэлж, үзэл бодлоо илэрхийлэх Хэвлэлийн эрх чөлөөний энэ өдөр сэтгүүлчид “Ёс зүйтэй байхаа амлалаа”. Монгол улсад төлөөллийн ардчилалыг бэхжүүлэх ээлжит сонгууль тохиож буй энэ цаг үед хүний эрх, жендэрийн мэдрэмжтэй байх, уншигч, үзэгчдэдээ бодитой, тэнцвэртэй мэдээллийг хүргэх нь сэтгүүлч бидний мэргэжлийн ёс зүйн үндсэн шаардлага билээ. Нөгөө талаас сэтгүүлчдэд учирч буй аюул занал, сэтгүүл зүйн үйл ажиллагааг хязгаарлах хууль, эрх зүйн зохицуулалт хүрээгээ тэлж, мэдээллийн ил тод бус байдал байсаар байгаагийн дэргэдүүр дуугүй өнгөрч болохгүй ээ. Тиймээс сэтгүүлч бид сэтгүүл зүйн хариуцлагаа улам бодитоор хэрэгжүүлж, ёс зүйгээ мэргэжлийн ур чадвартайгаа хослуулан ажиллах шаардлага урд урдынхаа илүү ихээр тавигдаж байна. Ингэснээрээ олон нийтийн итгэлийг олж, тэдний дэмжлэг, оролцоо бүхий сэтгүүл зүйг эрхлэх боломж бий болно.
