Монгол Улс жендэрийн эрх тэгш байдал, эмэгтэйчүүдийн манлайллын асуудлаар бүс нутагт төдийгүй олон улсад ихээхэн санаачилга, оролцоотой орны тоонд орж байна.
Жендэрийн эрх тэгш байдал, улс төр, шийдвэр гаргах түвшинд эмэгтэйчүүдийн оролцоог нэмэгдүүлэх чиглэлээр эрх зүй, бодлогын орчны шинэчлэлийг хийж ажилласаны үр дүнд УИХ-ын Сонгуулийн тухай хуульд тусгагдсан хүйсийн 20 хувийн квотыг нэмэгдүүлж, 2024 онд 30 хувь, 2028 онд 40 хувь байх зохицуулалтыг тусгасан мөн УИХ-ын сонгуулийн системийг өөрчилж холимог системийг нэвтрүүлж 78 гишүүн тойрогт, 48 гишүүн жагсаалтаар, жагсаалтын 48 гишүүнийг 1:1 буюу эрэгтэй, эмэгтэй сөөлжүүлэхээр хуульчилсан нь түүхэн бөгөөд олон улсад сайн туршлага болохуйц шийдвэр болсон юм.
Үүний үр дүнд 2024 оны сонгуульд 32 эмэгтэй гишүүн сонгогдож, Парламентад эзлэх эмэгтэйчүүдийн хувь 25.4 хувьд хүрлээ. Энэ нь Монгол Улсын Парламентын түүхэнд хамгийн өндөр үзүүлэлт бөгөөд Азийн дундажийг ахиулж, Дэлхийн дундаж болох 26.9 хувь руу дөхсөн үзүүлэлт юм.
Түүнчлэн Монгол Улсын Ерөнхий сайд, Жендэрийн үндэсний хорооны даргын жендэрийн манлайллаар 21 аймгаас анх удаа Ховд аймгийн Засаг даргаар эмэгтэй хүнийг томилж, улмаар 2024 оны УИХ-ын сонгуульд аймгийн эмэгтэй засаг дарга анх удаа УИХ-ын гишүүнээр сонгогдсон тохиолдол байлаа. Мөн мэдлэг боловсролтой залуу эмэгтэйчүүдийг Сайд, Дэд сайд, яамны ТНБД-аар томилж эмэгтэйчүүдийг дэмжин ажиллаж байна.
Бид жендэрийн эрх тэгш байдлыг хангахад олсон амжилт ололтоо бататган шинээр гарч буй асуудлуудад шийдэл олсноор хүний эрх, сайн засаглалыг хэрэгжүүлж улс, нийгэм, ард түмнээ сайн сайхан амьдралд хөтлөнө хэмээн үзэж байна. Иймд бодлого боловсруулалт, төлөвлөлт, хэрэгжилтийн болон хөрөнгө зарцуулалтын хяналт үнэлгээг үр бүтээлтэй явуулах үндэсний чадавхыг нэмэгдүүлэх, бусдаас сурах, туршлагаа бусадтай солилцох, хамтын ажиллагаагаа бэхжүүлэх нь нэн чухал юм.
ЗОРИЛГО
Тогтвортой хөгжлийн зорилгын хэрэгжилтийг хангах, салбар, орон нутгийн түвшинд тулгамдсан асуудлыг шийдвэрлэхэд эмэгтэйчүүдийн оролцоог идэвхжүүлэх, манлайллыг дэмжих, шилдэг туршлагыг хуваалцах, олон талт хамтын ажиллагааг өргөжүүлэхэд оршино.
ЗОХИОН БАЙГУУЛАГЧИД БОЛОН ОРОЛЦОГЧИД
Жендэрийн Үндэсний хороо НҮБ-ын Хөгжлийн Хөтөлбөртэй хамтран хэрэгжүүлж буй “Монгол Улсад шийдвэр гаргах түвшинд жендэрийн тэгш байдал, эмэгтэйчүүдийн оролцоог дэмжих нь” төслийн хүрээнд Ховд аймгийн ЗДТГ-тай хамтран тус Үндэсний форумыг аймаг, нийслэл, сум, дүүргийн 500 зочид, төлөөлөгчдийг оролцуулан зохион байгуулна.
Үүнд:
- УИХ-ын гишүүн, яам, агентлаг, аймаг, нийслэл, сум, дүүргийн нутгийн захиргааны болон нутгийн өөрөө удирдах байгууллага, ТББ, ИНБ зэрэг байгууллагын удирдах албан тушаалтан, зочин төлөөлөгч – 25 хүн
- Баруун бүсийн 4 аймгаас тус бүр 10 төлөөлөгч (УИХ-д суудалтай улс төрийн нам, эвслийн дэргэдэх эмэгтэйчүүдийн байгууллагуудын тэнцүү оролцоог хангасан удирдах албан тушаалтан) – 40 хүн
- Ховд аймгийн 16 сум тус бүрээс 2 төлөөлөгч (ИТХ, ЗДТГ) – 32 хүн
- Ховд болон бусад аймаг /Зардлыг тус аймаг өөрөө хариуцах/-ийн төр, төрийн бус байгууллага, иргэний нийгмийн байгууллага, хувийн хэвшлийн байгууллага болон улс төрийн намуудын дэргэдэх эмэгтэйчүүдийн байгууллагуудын удирдах албан тушаалтан, төлөөлөгч– 400 хүн.
ХЭЛЭЛЦЭХ АСУУДАЛ
Форумд оролцогчид хууль тогтоомжийн хэрэгжилт, улс төрийн шийдвэр гаргах түвшинд эмэгтэйчүүдийн манлайлал зэрэг харилцан уялдаатай сорилтыг шийдвэрлэх зорилгоор хөдөөгийн охид, эмэгтэйчүүдийн аж байдлыг сайжруулахад чиглэсэн үйл ажиллагаа, улс төр, эрх зүй, эдийн засаг, нийгэм, соёлын салбарын асуудалд анхаарсан сэдвүүдийн талаар хэлэлцэнэ.
- Улс төр, шийдвэр гаргах түвшинд ажиллаж буй эмэгтэйчүүдийн орон нутгийн хөгжилд оруулж буй хувь нэмэр ;
- Орон нутгийн хөгжлийн бодлого төлөвлөлтөд жендэрийн тэгш байдлыг хангах, сайн туршлага;
- Нутгийн өөрөө удирдах болон нутгийн захиргааны байгууллагын шийдвэр гаргах түвшинд ажиллаж буй эмэгтэйчүүдийн манлайлал, сайн туршлага;
- Эмэгтэйчүүдийн улс төрийн оролцоог дэмжих, талуудын хамтын ажиллагаа.
