Волейболын үндэсний дээд лигийн аварга шалгаруулах тэмцээний хагас шигшээ тоглолтууд үргэлжилж байгаа билээ. Энэ удаагийн хагас шигшээ тоглолтод учраа таараад байсан Хөвсгөл Эрчим, Ховд Ижил Алтайн Барс багуудын цувралын хоёр дахь тоглолт өнөөдөр болж өндөрлөлөө.
Өмнөх тоглолтод “Хөвсгөл Эрчим” баг ялалт байгуулсан бөгөөд энэ удаа мөн л ялалт авснаар цувралын харьцааг 2:0 болгож аваргын төлөө хоёр дахь жилдээ шалгарч үлдлээ.
Тэд өмнө жилийн лигт энэ бүрэлдэхүүнээр анхлан оролцож лигийн аварга болж байсан. Харин энэ жил дахин аваргаа хамгаалахаар шалгарч байна.
Сонирхолтой нь “Хөвсгөл-Эрчим” багийн ихэнх тоглогчид Хобби Эйс багийн өмнөх бүрэлдэхүүнд багтаж байсан бөгөөд тэд мөн л хоёр жил дараалан аваргын төлөө шалгарч байсан бахдам амжилттай. Онцолбол Хосбаяр, Хонгорзул нар ийнхүү дөрвөн жил дараалан дээд лигийн аваргын төлөө шалгарлаа.
“Хөвсгөл Эрчим” баг одоо “Хилчин” болон “Тэнүүн Огоо” багуудын цуврал тоглолтод ялалт байгуулсантай нь лигийн аваргын төлөөх тоглолтуудаа хийх аж.
