Дэлхийн алдарт реппер “Eminem”-ийн ээж Дебби Нелсон 69 насандаа таалал төгсжээ.
“Eminem” хэд хэдэн дуундаа хар тамхины хамааралтай ээжийгээ шүүмжилж, Дебби Нелсонг олны танил болгож байсан. “Eminem”-ийн хит дуунуудын нэг болох “Cleanin’ Out My Closet” дээр түүний ээжтэй харьцах харьцаа нь илт байв.
2002 онд гарсан дуундаа “Eminem” ээжийгээ хар тамхи хэтрүүлэн хэрэглэж, үл тоомсорлодог байсан хэмээн ууртайгаар буруутгаж байсан ч удаатай. Дебби Нелсон харин энэ дуунуудынх нь хариуд хүүгээ “нэр төрд халдсан, гүтгэсэн” хэргээр шүүхэд өгч байжээ.
Гэсэн хэдий ч тэдний хортой харилцаа тийм ч олон жил үргэлжлээгүй юм. 2013 онд гаргасан “Headlights” дуундаа “Eminem” ээждээ хандаж хийсэн өмнөх дууныхаа зарим үгэнд гэмшиж байгаагаа илэрхийлж байжээ. “Eminem” 2022 онд Рок энд Роллын алдрын танхимд элсэх үед Дебби Нелсон цахим орчинд хүүдээ баяр хүргэж байв.
Тэрээр бичлэгтээ “Маршал, би чамд баяр хүргэхгүйгээр энэ өдрийг өнгөрөөж чадахгүй нь. Би чамд маш их хайртай. Би чамайг тэнд очно гэдгийг мэдэж байсан. Урт удаан аялал байсныг нь мэдэж байна. Би чамаар маш их бахархаж байна” хэмээжээ.
