УИХ-ын гишүүн Ж.Баясгалан хуулийн төслийг танилцуулахаар индэр рүү дөхөх үедээ чуулганы танхимд тэргэнцэртэйгээ уналаа. Одоогоос хэдэн сарын өмнө түүнд зориулсан индрийг зассан талаар мэдээлэл цацагдаж, УИХ-ын танхимд түүхэндээ анх удаа тэргэнцэртэй хүний өндрийн хэмжээнд таарсан индэр засагдаж байсан билээ. Гэхдээ индэр төдийгөөр асуудал хязгаарлагдаггүй гэдгийг өнөөдрийн үйл явдал баталж байна. Тэргэнцэртэй гишүүн суудлаасаа асуудалгүй тийш очих боломж бүрэн хангагдаагүй байсан нь Ж.Баясгалан гишүүн унаснаас харагдаж байна. УИХ-ын танхим нь тусгай хэрэгцээт хүмүүсийн дэд бүтцийн асуудлыг шийдэж чадаагүй байгаа гэдэг нь бүхэлдээ улс орон ямар байгааг харуулж байгаагийн энгийн нэг жишээ юм. Тусгай хэрэгцээтэй иргэн бүрийнхээ эрсдэл, тулгарах асуудлыг нэгбүрчлэн харж чадах нь иргэндээ ээлтэй төр байгааг баталдаг.
Төрийн ордондоо ийм байхад гудамд ямар байгаа нь бүр тодорхой билээ.
Өнгөрсөн УИХ-ын сонгуулиар төлөөллийг хангахад ямар нэг байдлаар анхаарч, улс төрийн томоохон намууд жагсаалтаар ганц ганц болтугай гишүүд оруулж ирсний давуу тал жижиг болтугай үүгээр харагдаж байна.
З.ГАЛ
