Засгийн газрын лхагва гарагийн хуралдаанаар Гаалийн ерөнхий газрын даргыг томилжээ. Саяхан өөрийн хүсэлтээр Сонгуулийн ерөнхий хорооны даргын албан тушаалаа өгч байсан П.Дэлгэрнаран энэ албанд очсон байна.
П.Дэлгэрнаран өмнө нь Үндэсний соёл, амралтын хүрээлэнгийн захирал, Нийслэлийн өмчийн харилцааны газрын дарга, Баянзүрх дүүргийн Засаг даргын орлогч, “Автобус-3” компанийн захирал, “Авто тээврийн үндэсний төв” төрийн өмчит үйлчилгээний газрын тэргүүн дэд захирлаар байгаад СЕХ-ны даргаар ажиллаж байсан юм.
Гаалийн Ерөнхий газрын дарга Р.Отгонжаргалыг албанаас нь буулгасны дараа дэд дарга, мэргэжлийн гаальч Г.Энхтайван түр үүрэг гүйцэтгэгчээр томилогдсон байсан. Гаалийн байгууллагын хувьд дарга нар нь үргэлж улс төрийн томилгоогоор гаднаас ирдэг бөгөөд энэ удаад мэргэжлийн байгууллага гэсэн утгаар сонгон шалгаруулалт зарлаж явуулах нь гэсэн яриа сонстож байсан боловч урьдынхаараа томилгоо хийгдэв бололтой.
