Их хэмжээний санхүүгийн луйвар хийсэн Вьетнамын үл хөдлөх хөрөнгийн томоохон компанийн тэргүүн Truong My Lan-д Хо Ши Мин хотын шүүх цаазын ял оноожээ.
Тэрээр үл хөдлөх хөрөнгийн “Van Thinh Phat” группын ерөнхийлөгч ба 2022 оноос залилангийн хэрэгт буруутгагдан баривчлагджээ. Тус хэргийн шүүх хурал нь энэ оны гуравдугаар сарын 5-нд эхэлсэн юм байна.
Энэхүү хэрэг нь Вьетнамын түүхэн дэх хамгийн том, Зүүн Өмнөд Азийн орнуудад гарсан хамгийн том санхүүгийн луйвруудын нэг юм байна.
Түүний луйвардсан мөнгөний хэмжээ $12.5 тэрбум буюу Вьетнам улсын 2022 оны дотоодын нийт бүтээгдэхүүний 3 орчим хувьтай тэнцэх юм.
Түүний гэмт хэрэг 2011 оноос “Saigon Commercial Joint Stock Bank” арилжааны банкийг өөр хоёр банктай нэгтгэсэнээр эхэлжээ.
Lan тухайн банкнуудын шууд удирдлага байгаагүй ба өөрийн хүмүүсээр дамжуулан 91.5 хувийг нь эзэмшиж, 2,500 гаруй удаа зээл авчээ. Мөн луйвраа нуухын тулд төрийн өндөр албан тушаалтнуудад авлига өгсөн хэрэгт буруутгагдсан байна.
Вьетнам улсад цаазын ялыг зөвхөн хүн амины хэрэг, хар тамхины хэрэгт оноодог. Харин санхүүгийн луйвар, авлигын хэрэгт өмнө нь оноож байгаагүй юм. Эмэгтэйд оноосон хатуу шийтгэл нь Вьетнамын эрх баригчид авлигын эсрэг явуулж буй тэмцэлдээ өндөр ач холбогдол өгч, хатуу байр суурьтай байгааг харуулж байна.
Эх сурвалж: A $12 Billion Financial Fraud Case Highlights Risks in Vietnam (businessinsider.com)
