Стратеги судалгааны хүрээлэнгийн эрхлэн гаргадаг “Стратегийн судалгаа” эрдэм шинжилгээний сэтгүүл Монголын эрдэм шинжилгээний сэтгүүлүүдийн нэгдсэн цахим платформ MongoliaJOL-д нэгдэн, Crossref олон улсын мэдээллийн санд бүртгэгдсэнээр цахим хувилбараар нийтийн хүртээл болж эхэллээ. Ингэснээр тус сэтгүүлд нийтлэгдсэн эрдэм шинжилгээний өгүүлэл бүр DOI (Digital Object Identifier) дугаараар олон улсын мэдээллийн санд бүртгэгдэн, улмаар шинжлэх ухааны эргэлтэд нэвтэрч байна.
DOI нь уламжлалт URL хаягтай харьцуулахад маш олон давуу талтай бөгөөд тэдгээрийн гол үнэ цэн нь баталгаатай байдал болон таних өвөрмөц чанарт оршдог байна.
DOI нь тухайн дижитал обьектод нэг удаа оноогддог бөгөөд хэзээ ч өөрчлөгддөггүй. Эрдэм шинжилгээний болон судалгааны ажлуудад эш татагдах үед DOI нь тухайн мэдээллийг найдвартай, албан ёсны эх сурвалж мөн болохыг баталгаажуулдаг. Энэ нь эрдэмтэн, судлаачдад маш чухал бөгөөд олон улсын хэмжээнд мэдээлэл солилцох, дата баазуудыг удирдах, ном зүйг хөтлөхөд DOI нь стандартчлагдсан хэл болж, автоматжуулалт болон хайлтыг хялбаршуулдаг байна.
