Өчигдөр цахим орчинд /2025.03.06/ нэгэн иргэн дүүг нь өсвөр насны охидууд нийлж зодож, дарамталж, айлган сүрдүүлж, цахимаар мөн давхар сүрдүүлж байгаа талаар мэдээлж, цагдаагийн байгууллага шалгаж, хариуцлага тооцохыг хүссэн.
Энэ хэргийг цагдаагийн байгууллагаас шалгаж байгаа эсэх талаар тодрууллаа. ЦЕГ-аас өгсөн мэдээллээр, тус хэрэгт хэрэг бүртгэл нээж, мөрдөн шалгаж ажиллагаа явуулж байгаа. Шалгалтын ажил үргэлжилж байгаа учир мэдээлэл өгөх боломжгүй. Өмнө нь гаргасан гомдол мэдээллийн дагуу цагдаагийн байгууллага хэрэг бүртгэл нээсэн гэв.
Хохирогч охины ар гэрийнхний цахим хуудаст бичсэн мэдээллээр, оны өмнө дүү нь зодуулж ирэхэд цагдаагийн байгууллагад хандсан. Өсвөр насны хүүхдүүд учир цагдаагийн байгууллагаас хорьж, байцаасан зүйл байхгүй. Эцэг, эхийг нь дуудахад очоогүй гэсэн. Биднээс болон дүүгээс маань уучлалт гуйгаагүй. Харин ч удаа дараа сүрдүүлж, гэрийнхэндээ болон цагдаад хэлбэл илүү хохирно шүү гэж сүрдүүлсэн талаар дүрс бичлэг болон чаттай нь нийтэлсэн ажээ.
Үе тэнгийнхнээ айлган сүрдүүлж, дээрэлхэж, дарамталдаг гэх охидууд нь хэсэг бүлгээрээ нийлдэг бөгөөд тус асуудал анхны удаа үүссэн зүйл биш аж. Үе тэнгийнхэндээ дарамтлуулсан олон тохиолдлоор цагдаагийн байгууллагад дахин баримттай хандана гэдгээ хохирогч охины ар гэрийнхэн мэдэгджээ.
