Өчигдөр Төсвийн байнгын хороо хуралдаж, Ерөнхийлөгчийн хоригийг хүлээн авахаар болжээ. “Алт 3” хөтөлбөрийг эрчимжүүлэх тогтоолыг өнгөрсөн долдугаар сард УИХ-ын чуулган дээр баталсныг Ерөнхийлөгч У.Хүрэлсүх өөрийн эрхийн хүрээнд хэсэгчилсэн хоригийг тавьсан юм. Байгаль орчинд халтай, тусгай хамгаалалттай газар нутагт халдах эрсдэл бүхий хуудуутай шийдвэрийг засах эхний алхам ийнхүү тавигдлаа.
Алтны үндсэн ордуудыг эдийн засгийн эргэлтэд оруулах зорилгоор УИХ-ын 2020 оны 46, 47 дугаар тогтоолуудад өөрчлөлт оруулан байж гаргасан энэхүү тогтоол гарсан цагаасаа олон нийт, байгаль хамгаалах байгууллагуудын шүүмжлэлд өртсөн билээ.
Харин Ерөнхийлөгч энэхүү алдааг анзааран яаралтай хориг тавьсныг гишүүд ч өөрсдөө хүлээн авч байгаа нь сайн хэрэг юм.
“Алт 3” хөтөлбөрийн хүрээнд томоохон үндсэн ордоо эдийн засгийн эргэлтэнд оруулж алтны нөөцөө нэмэгдүүлж, валютын нөөцийг зузаатгаж, Үндэсний баялгийн сангаа нэмэгдүүлэх, төгрөгийн ханшаа тогтвортой байлгах зорилготой хэмээн мэдэгдэж байсан ч урьд өмнийн “Алт” хөтөлбөрүүд юу болсон билээ, тэр тусмаа алтны үндсэн ордуудыг эдийн засгийн эргэлтэд оруулах нэрээр улсын тусгай хамгаалалтад авсан газар нутаг, түүний хилийн заагийг өөрчилж, тусгай хамгаалалттай газар нутгийн хэмжээг багасгах хууль зүйн нөхцлийг бүрдүүлж байгаа нь хууль зөрчиж байгаа хэрэг гэж олон нийт үзэж байлаа.
