АНУ-ын Охайо мужийн нэгэн ахлах сургуулийн 16 настай тамирчин хүү Дилан Веселич энэ долоо хоногийн эхээр лакроссын тоглолтын үеэр дагзандаа бөмбөгөөр цохиулан эмнэлэгт хүргэгдсэн аж.
Дилан Веселичид өнгөрсөн мягмар гаригт яаралтай хагалгаа хийсэн ч амийг нь аварч чадаагүй байна. Энэ талаар хүүгийн гэр бүлийнхэн сошиал хаягтаа таалал төгссөн тухай харамсалтай мэдэгдэл оруулжээ.
“Лакроссын тэмцээний үеэр гэмтэл авсан Дилан маань амьсгал хураасныг Веселичийн гэр бүлийнхний зүгээс гашуудан мэдэгдэж байна. Энэ хүнд хэцүү үед та бүхний сайхан сэтгэлийн дэмжлэгт талархаж байгаагаа илэрхийлье. Хүнд хэцүү цаг үед бидний төлөө залбирч, сэтгэл зүрхэндээ үргэлжлүүлэн тээж явахыг та бүхнээс хүсье” хэмээн талийгаач хүүгийн гэр бүлийн мэдэгдэлдээ дурджээ.
Лакросс нь 2028 оны Олимпын наадмын албан ёсны төрөлд эргэн багтаж байгаа спортын төрөл юм. Эргэн гэхийн учир нь 1908 оны олимпын наадмын төрөлд байжээ. Лакроссын бөмбөг нь ойролцоогоор 140 грамм жинтэй гэж тэмдэглэсэн байна. Хэдийгээр жин багатай ч гэлээ хүний эмзэг газар хурдтай хүчтэй очвол үхэлд ч хүргэж болохыг энэ эмгэнэлт явдал харууллаа.
