Улсын Ерөнхий прокурорыг улируулан томилох асуудлыг Ерөнхийлөгчийн зүгээс УИХ-д оруулж, өнгөрсөн баасан гаригт гишүүд бүгд санал нэгтэйгээр дэмжсэн билээ. Тэгвэл Ерөнхийлөгч хууль зөрчин энэ саналыг оруулж, гишүүд ч хууль зөрчин баталсан нөхцөл үүсч байх шиг байна. Энэ талаар Үндсэн хууль судлаач гэгддэг, хуульч Б.Гүнбилэг “Ерөнхийлөгч У.Хүрэлсүх ахад: Хэрвээ 61 настай хүнийг ерөнхий прокуророор томилбол Үндсэн хууль зөрчсөн болох гээд байна шүү. Зандка ах, бусад зөвлөхүүд нь хэлээрэй. Дараа нь Цэцэд бас нэг цаас өгөх гээд ажил болмооргүй байна” гэж бичжээ. Тэгээд “…Прокурорын тэтгэвэрт гарах насны дээд хязгаар нь 60 нас байх ба 50 насанд хүрсэн эмэгтэй, 55 насанд хүрсэн эрэгтэй, эсхүл нас харгалзахгүйгээр прокуроор 25 жил ажилласан прокурор өөрөө хүсвэл өндөр насны тэтгэвэр тогтоолгож болно” гэсэн хуулийн заалт хавсаргажээ.
Улираан томилогдсон Улсын Ерөнхий прокурор Б.Жаргалсайхан нь 2019 оноос тус албанд ажилласан бөгөөд 1964 онд төрсөн, прокурорын байгууллагад нийт 37 жил ажилласан талаар намтарт нь байдаг.
Тэгэхээр Улсын Ерөнхий прокурорыг томилсон энэ асуудал Үндсэн хуулийн Цэцэд очихоор болж байна уу?
