Төмөр замын ачаа эргэлт дээр авлига цэцэглүүлж, гэрээс нь 7.5 тэрбум төгрөг гарч ирж байсан С.Батдөл гэдэг этгээдийн “сураг” гарлаа. Сурагсах юу байхав, угаасаа гэмт хүн шүүхээс хорих руу ачигдсан. Гэтэл түүнийг Богд уулан дахь амралтын газар ялаа эдэлж байна гэдэг сонин мэдээллийг өчигдөр УИХ-ын гишүүн Баттөмөрийн Энхбаяр палхийтэл мэдэгдлээ. Тэгээд түүнийг тийм газарт ял эдлүүлж байгаа сайд байна гэж хэллээ. Тийм сайд байж, авлигыг нь илчлээгүйн төлөө одоо ийнхүү С.Батдөлд ач үзүүлж байгаа гэлээ. Гэтэл олон мянган хүний амийг аварсаар ирсэн, хэргийг нь Дээд шүүх зөв шийдэхийг олон нийт хүлээж байгаа П.Батчулуун эмчийг гэхэд л бие нь улам муудаж сандаргалаа гэхэд эмнэлгийн яаралтай тусламж үзүүлэхэд амжих боломжгүй газар руу аччих гээд айлгаад байгаа яриа дуулдана.
АТГ-ын даргад З.Дашдавааг томилуулах тухай асуудал цэгцлэгдэж байгаатай тохиолдуулан Б.Энхбаярын энэ мэдэгдэл гарч ирсэн нь их сонин. Төмөр замын хэрэг гэж хоёр гурван жилийн өмнө айхавтар юм болж байлаа. Х.Хэрлэн хэмээх даргыг Төмөр замын дарга байлгах уу, болих уу , дээрээ тулаад л. Гэтэл хэргийн эзэн С.Батдөл ийнхүү эвлэг газар ялаа эдлэж байгаа юм байна. Б.Энхбаярын хэлээд байгаа үнэн л дээ. Тийм хэрэг хийсэн хүн тийм газар ялаа эдэлж байна аа гэдэг чинь түүнд анхаарах бодит хүчин байна аа гэсэн үг. Тийм сайд байна аа гэсэн үг. Энэ бол АТГ-ын даргаар ахин томилогдож байгаа З.Дашдаваад л “ховлож” байгаа зүйл байх. Б.Энхбаяр өчигдөр бас нэг үг хэллээ. Тэр эх оронч хулгайч, хуульчлагдсан хулгайч Халтмаагийн Баттулгыг хуралд нь ирүүл, суулга гэсэн байна. Эв эрүүл зарчим, шаардах ёстой хууль, нэхэгдэж байгаа үнэн. Энэ хүн угаасаа хурал номдоо суухгүй байна гээд улсаар нэг юм болоод , Ёс зүйн байнгын хороо нь донго шийтгэл оноогоод, өөрөө болохоор эх орны баялгийг ард түмэнд гээд улсаа тойроод яваад байгаа. Гэтэл үнэндээ ард түмэнд биш, ард түмэнд гэгч Х.Баттулга өөрөө гадаадынханд Төгрөг нуурын ордыг 250 сая ам.доллараар зарсаан гэдгийг Засгийн газрын хэрэг эрхлэх газрын дарга , сайд Н.Учрал мэдэгдчихсэн. Өчигдөр бүр Засгийн газар хуралдаад, Х.Баттулгад ордыг зарсан бантангаа зохицуул, авч ир гэдэг шаардлагыг долоо хоногийн хугацаатай өгчихлөө. Н.Учрал сайд улсын ард түмний эрх ашгийн үүднээс ингээд хэлж байна. Гурван тэрбум тоннын нөөцтэй, Монголын нэг иргэнд 87 сая төгрөг буюу элбэг нэг өрөө байр болж очих боломжтой ордоо Засгийн газар нэхэлгүй яахав дээ. Нэг, нэжгээд иргэнд шүү. Ингээд Төгрөг нуурыг зарсан Х. Баттулгыг Ерөнхий сайд Л.Оюун-Эрдэнэ тэргүүнтэй Монголын Засгийн газар дуудаж байна. Асуудлаа шийд. Ард түмний баялагийг зарсанаа эргүүлж авчир, ард түмэндээ өг гээд шахаж эхэллээ. Долоо хоногт шийд гэсэн. Женко Х.Баттулга шийдэхээс аргагүй болжээ.
Z MAN
