Халдварт өвчин судлалын үндэсний төв (ХӨСҮТ)-өөс улаанбурхан өвчний нөхцөл байдлын талаар өнөөдөр /2025.03.14/ мэдээлэл өглөө.
Менингококкт халдвар буюу “Цахилгаан менингит”-ийн нэг сэжигтэй тохиолдол ХӨСҮТ-д тусгаарлагдан эмчлүүлж, шинжлүүлж байсан нь лабораторийн шинжилгээгээр батлагджээ.
Улаанбурхан өвчний тухайд өчигдрийн байдлаар улсын хэмжээнд батлагдсан тохиолдлын тоо 14 байсан бол тархалт хөдөө орон нутагт нэмж илрэн, 18 хүрээд байна. Тухайлбал, өнгөрсөн шөнө Өмнөговь аймгаас 12 сорьц авчран шинжилснээс гурав нь батлагджээ.
Цагаан сарын золголтын дараагаас Ерөнхий боловсролын сургуулийн хүүхдүүдийн дундаас улаанбурхан өвчний хавьтлын тохиолдол олноор нэмж бүртгэгдэж байгаа ба нийслэлийн Ерөнхий боловсролын 23 дугаар сургууль, “Эхлэл” сургуулиас ирсэн сорьцуудын шинжилгээний хариу түрүүчээсээ батлагдсаныг анхаарууллаа.
Түүнчлэн Улаанбурханы дархлаажуулалт болон нөхөн дархлаажуулалтыг өрх, дүүргийн эмнэлэгт, сайн дурын дархлаажуулалтыг ХӨСҮТ-д хийж байна. Иймээс иргэд олон нийт вакцинд хамрагдсан эсэхээ тодорхойлж, хамрагдаагүй бол дархлаажуулалтдаа хамрагдах хэрэгтэй. Улаанбурхны халдварыг хяналтдаа авахад иргэдийн оролцоо, дэмжлэг хэрэгтэйг эмч мэргэжилтэнүүд тодотголоо.
