Өнгөрсөн пүрэв гарагт 1006 дугаартай Боинг 737-800 онгоц Колорадо Спрингс нисэх онгоцны буудлаас орон нутгийн цагаар 16:52 цагт хөдөлж, Даллас Форт Уэрт олон улсын нисэх онгоцны буудал руу чиглэсэн боловч хөөрөөд удаагүй байхад хөдөлгүүрт нь чичирхийлэл мэдрэгдсэнийг хөлгийн багийхан Холбооны нисэхийн удирдлагын газарт мэдээлжээ.
Денверийн онгоцны буудалд газардаад төд удалгүй хөдөлгүүрт гал гарч, зорчигчид гулсуур ашиглан онгоцноос гарч амжжээ. Мөн зарим зорчигчидыг онгоцны далавч хэсэг дээр зогсоож, буудлын ажилчдын тусламжтайгаар шат ашиглан шатаж буй онгоцноос шилжүүлсэн гэж Холбооны Нисэхийн Захиргаа мэдэгджээ. Онгоцонд нийт 172 зорчигчид, онгоцны багийн зургаан гишүүн байжээ. ABC News мэдээлснээр нүүлгэн шилжүүлэх явцад цөөн хэдэн хөнгөн гэмтэл гарсан бөгөөд зургаан зорчигчийг эмнэлэгт хүргэсэн байна.
Өнгөрсөн нэгдүгээр сард Америкийн агаарын тээврийн нисэх онгоц нисдэг тэрэгтэй мөргөлдөж, 67 хүний амийг авч одсон билээ. Энэ ослоос хойш хэдэн долоо хоногийн дараа Дональд Трамп “Холбооны Нисэхийн Захиргаа”-ны ажилтнуудыг халсан байдаг. Эдгээр осол, үйл явдлууд олон нийтийн агаарын тээврийн салбарт итгэх итгэлийг алдагдуулсаар байгаа юм.
