Засгийн газраас 2024-2028 онд Хот байгуулалт, барилга орон сууцжуулалтын яамтай хамтран нийслэлийн гэр хорооллыг орон сууцжуулах хөтөлбөрийг хэрэгжүүлэхээр төлөвлөсөн байна. Дөрвөн жилийн хугацаанд 150 мянга орчим айлыг орон сууцжуулах ажлыг хийх юм байна. Ингэхдээ ипотекийн зээлийг ихээр санхүүжүүлэх юм байна. Ипотекийн зээлийг санхүүжүүлэхэд зориулж өнгөрсөн хугацаанд Монголбанкнаас 6.1 их наяд төгрөгийг зарцуулжээ. Жилийн зургаагаас гурван хувийн хүүтэй олгогдох болсон ипотекийн зээлийн хүртээмжийг нэмэгдүүлэх зорилгоор Засгийн газраас энэ жил Хуримтлалын сангийн 500 тэрбум төгрөгийг энэхүү зээлд зориулан гаргасан. Одоогийн байдлаар ипотекийн зээлийн хүү орон нутагт жилийн гурван хувь бол нийслэлд зургаан хувь байгаа.
2024-2028 онд 150 мянга орчим айлын орон сууцыг барихаар төлөвлөсний дийлэнх хувийг хөдөө орон нутагт түлхүү хэрэгжүүлэх юм байна. Тухайлбал 21 аймагт ипотекийн зээлийн 50-иас дээш хувийг зарцуулах аж. Засгийн газраас хэрэгжүүлж буй “Шинэ сэргэлтийн бодлого”-ын хүрээнд хөдөөгийн сэргэлтэд чиглэсэн үйл ажиллагааг бодлогоор дэмжихээр төлөвлөсөн. Энэ хүрээнд тухайн аймгийн Засаг даргын ерөнхий төлөвлөгөөнд орон сууцжуулах хөтөлбөрийг тусгаж өгөх аж. Тодруулбал орон сууц барих дэд бүтэц, газрын асуудлыг шийдэх юм байна. Мөн амины орон сууц барих гэж буй иргэдийг 30 хүртэлх сая төгрөгөөр санхүүжүүлэхээр төлөвлөж байгаа аж. Ингэхдээ байгаль орчинд ээлтэй, эрчим хүчний хэмнэлттэй байх шаардлагыг тавих гэнэ.
