Япончууд удахгүй болох аймшгийн баярыг угтан дэлхийн хамгийн анхны зомбитой хурдан галт тэргийг үйлчилгээнд нэвтрүүлсэн байна. Токиогоос Осака хүрэх хоёр цаг 30 минутын зомбитой аялалд таныг урьж байна. Уг аялалыг 2016 онд олны хүртээл болсон “Бусан хүрэх галт тэрэг” киноноос санаа авч зохион байгуулжээ.
“Kowagarasetai” буюу “Таныг айлгамаар байна” нэртэй айлгах багийнхан уг аяллыг зохион байгуулж байгаа аж. Сэтгэл хөдлөм эхний аялалд амьд үхдэлүүдтэй тулалдах зоригтой 40 орчим хүн хамрагджээ. Гэхдээ хурдан галт тэрэгний үндсэн дүр төрхийг гутаахуйц хэт хүчирхийлэлтэй дүрслэлээс зайлсхийсэн байна. Ингэхдээ тоглоомон хөрөө, буу зэргийг ашигласан бөгөөд аймшигт байдлыг тэнцвэржүүлэхийн тулд ид шидтэнгүүд, хошин шогийн жүжигчидийн үзүүлбэр үзүүлжээ. Тус галт тэрэгээр аялах үнэ 50 мянган иен байжээ.
Японы төмөр зам нүд гялбам цэвэрхэн, осол эндэгдэлгүй аялал зохион байгуулахыг зорьдог тус байгууллага Covid-19 цар тахлын дараа бизнесээ төрөлжүүлэх зорилгоор галт тэрэгний тасалгаагаа түрээсэлж эхэлсэн аж. Түрээсийн үйлчилгээ эхэлснээр хурдан галт тэрэгний тасалгаанд сүши зоогийн газар, баар, тэр бүү хэл бөхийн барилдаан хүртэл зохион байгуулагдах болжээ. Мөн хувь хүн үдэшлэг зохион байгуулах ч боломжтой.
