2024 оныг бүсгүйчүүдийн жил гэхэд хилсдэхгүй байх. Бид Тив, Дэлхийн аварга болж Оюуны спортын, тэсвэрийн манлайлал үзүүлж буй олон эмэгтэйчүүдийг харж байна. Монгол эмэгтэй хүний мэдлэг, оюун тэсвэр тэвчээр ямар болохыг харуулж буй эмэгтэйчүүдийн төлөөлөл бол уулчин, барилгын зөвлөх инженер Б.Батхишиг юм.
Тэрээр Гималайн нурууны 8163 метр өндөрт орших дэлхийн найм дахь оргил Манаслуд амжилттай гарчээ. Тэрбээр есдүгээр сарын 24-ний өглөө 05.08 цагт оргилдсон бөгөөд Манаслу оргилд гарсан Монголын анхны эмэгтэй уулчин болж байна. Жаргалант уулчдын клубын уулчин тэрбээр 2023 оны тавдугаар сарын 18-нд дэлхийн дөрөв дэх өндөр оргил гэгддэг 8516 м өндөрт байх Гималайн Лхоцед оргилдож байсан юм. Лхоце оргилд гараад дахин нэг 8000 метрийн өндөр оргилд гарна гэсэн зорилго өөртөө тавьсан байна. Ер нь уулчдын дунд 8000 метрээс дээш оргилд хөл тавина гэдэг амаргүй даваа байдаг бөгөөд 8000 м-ээс дээш гарсан уулчдын хувьд арай өөр зэрэглэлийн уулчинд тооцогддог.
Хөхний хорт хавдартайгаа ч мэдэхгүй Гималайн нэг оргилыг эзэлж явсан тэрбээр 2023 оны аравдугаар сард хөхний хорт хавдраар өвчилснөө мэдэж, 12-р сард мэс засалд оржээ. Харин энэ оны зургадугаар сард хавдрын эмчилгээгээ бүрэн хийлгэж, хавдрыг даван туулж чаджээ.
Уулчин Б.Батхишиг хорт хавдартай, хорт хавдрыг даван туулж яваа хүмүүст урам зориг өгч, хүн өөрөө хүсэж, зоригтой байвал зорилгодоо хүрч чаддаг гэдгийг харуулахаар энэхүү авиралтыг хийсэн гэж ярьсан байна.
Тэрбээр Монголоос ганцаараа явсан бөгөөд “8k expedition”-ийн шерпа нарын хамт Монгол, Америк, Англи, Беларус, Румын, Энэтхэг, Непалийн нийт 36 уулчинтай баг болж ууланд гарчээ. Өндөр уулын үйлчилгээ үзүүлдэг “8k expedition”-ээр өнгөрсөн жил багаараа Гималайд гарсан Жаргалант уулчдын клубын уулчид болон өнгөрсөн хавар эндсэн манай хоёр уулчин үйлчлүүлж байсан байсан билээ.
