Лхагва гарагт /2024.06.19/ Эквадорт улс даяар тог тасарч, 17 сая хүн цахилгаан эрчим хүчгүй болсон явдал гарсан байна.
Тус улсын Нийтийн дэд бүтцийн сайд Роберто Луке “Эрчим хүчний хяналтын үндэсний төвөөс бидэнд ирүүлсэн шуурхай мэдээлэл бол цахилгаан дамжуулах шугамд гэмтэл гарч улс даяар тог тасарсан” гэсэн юм.
Тог тасарсны улмаас эмнэлэг, метроны системийн үйл ажиллагаа тасалдсан бөгөөд тус улс олон жилийн турш эрчим хүчний хямралтай тэмцсээр байна.
Эквадорын Ерөнхийлөгч Даниэль Нобоа дөрөвдүгээр сард эрчим хүчний онц байдал зарлаж, улс даяар цахилгааныг найман цагийн турш хязгаарлах тушаал гаргаж байсан. Эквадор хөрш зэргэлдээ оршдог Колумб улсаас цахилгаан эрчим хүчээ авдаг байна.
Цахилгаан тасалдсанаас хойш хэдэн цагийн дараа тус улсын 95 хувьд нь тог ирсэн байна.
