Сармагчны цэцэг өвчин Энэтхэгт анх удаа бүртгэгдлээ. Дубай руу аялаад ирсэн 38 настай эрэгтэйгээс вирусын “clade Ib” омог илэрсэн байна. Өвчтөн өмнөд Керала мужид амьдардаг бөгөөд дөрөв хоног тутамд шинжилгээ өгч, тусгаарлагдаж байгаа аж.
Тухайн өвчтөнтэй ойр харьцсан 29 хүнийг олж тогтоож, тусгаарлажээ. Дубайгаас Керала хүрэх нислэгт зорчиж явсан 37 зорчигч болон өөр таван хүнийг мөн хянаж байгаа аж.
Хамгийн анх Ардчилсан Конго улсаас сармагчны цэцэг өвчин гарсан бөгөөд удалгүй ДЭМБ эрүүл мэндийн онц байдал гэж зарлаж байсан. Африк тивээс гадна Швед, Тайланд гээд хэд хэдэн улсад сармагчны цэцэг бүртгэгджээ.
ХАЛДВАРЛАХ ЗАМ
Сармагчны цэцэг өвчин нь Poxviridae овгийн Orthopoxvirus төрөлд багтдаг сармагчингийн вирусээр үүсгэгддэг. Ихэвчлэн Төв болон Баруун Африкийн халуун орны ширэнгэн ойд тархдаг зоонозын өвчин юм. Энэ нь хүнээс хүнд дамждаг вирусийн гаралтай халдварт өвчин. Өөрөөр хэлбэл, Гэмтсэн арьс, амьсгалын зам эсвэл нүд, хамар, амны салстаар дамжин халдварладаг байна.
ШИНЖ ТЭМДЭГ
Сармагчны цэцэг өвчний халдварын анхны шинж тэмдэг нь арьсан дээр тууралт өгснөөр илэрдэг. Ихэвчлэн халуурах, тууралт гарах, тунгалгийн зангилаа томрох зэрэг эмнэлзүйн шинж тэмдэг илэрч, 2-4 долоо хоног үргэлжилдэг.
ХАРИУ АРГА ХЭМЖЭЭ
Сармагчны цэцэг өвчний эсрэг тусгай вакцин болон эм бэлдмэл байхгүй. Гэхдээ энгийн салхин цэцэг өвчний эсрэг вакцин өндөр үр дүнтэй байдаг гэж ДЭМБ мэдээлжээ.
