Умард Солонгос хоёр дахь өдрөө Өмнөд Солонгос руу хогтой агаарын бөмбөлөг нисгэсэн гэж пүрэв гарагт /2024.09.05/ БНСУ-ын зэвсэгт хүчин мэдээлсэн байна.
Тодруулбал, БНСУ-ын Зэвсэгт хүчний штаб “Хойд Солонгос өглөөний 09:00 минутаас хойш дахин агаарын бөмбөлөг хөөргөж эхэлсэн тул бид иргэддээ тэнгэрээс эд зүйлс унаж болзошгүйг анхааруулсан” гэсэн юм. Өмнөх өдөр нь буюу лхагва гарагт /2024.09.04/ Хойд Солонгос 420 гаруй хогтой агаарын бөмбөлөг хөөргөсөн байна. БНСУ-ын нэгдлийн яам агаарын бөмбөлөг хөөргөж буй явдлыг “утгагүй” зүйл гэж шүүмжилжээ.
Тавдугаар сараас хойш БНАСАУ Өмнөд Солонгос руу олон мянган агаарын бөмбөлөг хөөргөсөн. Үүний хариуд Өмнөд Солонгос Пёняны эсрэг суртал ухуулга бүхий цаастай бөмбөлөг нисгэсэн байна. Мөн Өмнөд Солонгосын зэвсэгт хүчин долоодугаар сард хил дээр Пёняны эсрэг суртал ухуулга чанга яригчаар цацсан байжээ.
