АНДРОПАУЗ ГЭЖ ЮУ ВЭ?
Эмэгтэйчүүдийг зөвхөн цэвэршдэг гэж бид боддог. Эрдэмтдийн судалгаагаар эрчүүд ч 40-өөд насны дундаас цэвэршилттэй төстэй байдалд ордгийг нотолсон.
Эрэгтэй хүний тестостероны түвшин аажмаар буурч, энэ үйл явц олон жилийн турш үргэлжилдэг учраас эрчүүдийн цэвэршилт буюу андропауз тэр бүр анзаарагддаггүй өнгөрдөг.
Андропаузын үед ихэнх эрчүүдийн ой санамж, төвлөрөл муу болж бэлгийн дур хүсэл багасдаг. Эрчүүд ийм байгаагаа дунд насны хямралтай холбон ойлгож тайлбарлах хандлагатай байдаг. Энэ нь яг л эмэгтэйчүүдийн адил даавар багассан амьдралын өөр үе шатыг туулж байгаа явдал юм.
Хамгийн түгээмэл шинж тэмдэг нь зан ааш, сэтгэл санааны өөрчлөлт бөгөөд ядрах, эрч хүчээ алдах, бэлгийн дур хүсэл буурч бие махбодийн авхаалж самбаа багасдаг байна. Илүү их санаа зовоосон зүйл бол булчингийн масс багасах, хүч чадал буурах, биеийн өөхний хэмжээ нэмэгдэх зэрэг бие махбодийн өөрчлөлт аж.
Зарим эм бэлдмэл, таргалалт, бамбай булчирхайн түвшин буурах, бөөрний өвчин зэрэг нь эрчүүдийн эрт цэвэршилт буюу андропауз үүсэх шалтгаан болдог.
