Дэлхийн жишигт нийцсэн стандарт бүхий 200 ортой СЭЛБЭ нэгдсэн эмнэлгийн нээлт маргааш |2024.06.26| болно. Монгол Улсын хэмжээнд анх удаа орон нутгийн төсвийн хөрөнгө оруулалтаар Сүхбаатар дүүрэг барьж ашиглалтад оруулж байна.
Орчин үеийн эрүүл мэндийн салбарын стандарт бүхий дэлхийн жишигт нийцсэн энэхүү Сэлбэ нэгдсэн эмнэлэг нь үндсэн долоон мэргэжлээр тусламж үйлчилгээ үзүүлэх юм байна. Тодруулбал: Хүүхэд, эмэгтэйчүүд, чих, хамар, хоолой, дотор, мэдрэл гэсэн чиглэлээр Сүхбаатар дүүргийн 143 мянган иргэнд эмнэлгийн анхан шатны тусламж, үйлчилгээ үзүүлэх аж. Нийт хэвтүүлэн эмчлэх 200 ортойгоор үйл ажиллагааг явуулах ба үүнээс хүүхдийн тусламж үйлчилгээнд 40 ор байхаас 4 ор нь хүүхдийн эрчимт эмчилгээнийх. Харин насанд хүрэгчдийн 160 орноос 6 ор нь хүлээн авах яаралтай тусламжийн ажиглалт тусгаарлах, 20 ор нь насанд хүрэгчдийн эрчимт эмчилгээний байхаар төлөвлөгджээ. Мөн мэс заслын дөрвөн вакумжсан өрөөтэй байхаас гадна сувилагч нар сорьц, шинжилгээний дээжээ барьж гүйдэг явдлыг халж, сорьц, шинжилгээний дээжүүдийг зориулалтын лифтээр зөөх юм байна.
