ОХУ-ын Ерөнхийлөгч Владимир Путин өнөөдөр буюу мягмар гарагт 24 жилийн дараа анх удаа Хойд Солонгост айлчлахаар болжээ. ОХУ-ын ерөнхийлөгч Путин Хойд Солонгосын удирдагч Ким Жон Унтай нийслэл Пхеньянд уулзаж хэлэлцээ хийх юм байна. Энэ нь түүний 2000 оноос хойш Пхеньянд хийж буй анхны айлчлал болох юм.
Путин, Ким нар аюулгүй байдлын асуудлаар хамтын ажиллагааны гэрээнд гарын үсэг зурж, хэвлэлийнхэнд хамтарсан мэдэгдэл хийнэ. Энэ талаар Оросын хэвлэл мэдээллийн хэрэгслүүд мэдээлсэн бөгөөд Кремль энэ үйл явдлыг “нөхөрсөг төрийн айлчлал” гэж тодорхойлж байгаа аж.
Путин шинэ Батлан хамгаалахын сайд Андрей Белоусовын хамт хүрэлцэн ирнэ. Төлөөлөгчдийн бүрэлдэхүүнд Гадаад хэргийн сайд Сергей Лавров, Шадар сайд Александр Новак нар багтаж байгаа юм
АНУ-ын Цагаан ордон Орос, Хойд Солонгосын харилцааг ойртуулж байгаад санаа зовж байна гэжээ. Үндэсний аюулгүй байдлын зөвлөлийн хэвлэлийн төлөөлөгч Жон Кирби даваа гарагт “Бид Путины айлчлал санаа зовохгүй байна” гэж мэдэгджээ.
Хоёр орны харилцаа сүүлийн жилүүдэд, ялангуяа Орос Украинд бүрэн хэмжээгээр түрэмгийлснээс хойш улам бүр нэмэгдсээр байгаа. Вашингтон, Сөүл хоёр Пхеньян Москваг их буу болон бусад техник хэрэгслээр хангаж, хоол хүнс, цэргийн тусламж, технологийн тусламж өгсөн гэж буруутгаж байгаа юм.
