Жейтан Гилдер гэх 32 настай эр Флорида дахь “Tiffany & Co” брэндийн дэлгүүрээс 769,500 ам.долларын үнэ бүхий хос ээмэг дээрэмдээд түүнийгээ залгижээ. Орландогийн цагдаагийн газар Лхагва гаригт түүнийг баривчилсан бөгөөд гэдсэнд нь хэд хэдэн эд зүйл байгааг илрүүлсэн аж.
Тэрбээр дэлгүүрт орж ирээд өөрийгөө сагсан бөмбөгийн Орландо Мэжик багийн тоглогчийг төлөөлж явна гэж танилцуулж, хэд хэдэн үнэт эдлэл үзэж сонирхсон байна. Дараа нь дэлгүүрийн ажилтнаас ээмгийг хүчээр булаан аваад гарч зугтжээ. Мөрдөн байцаагчид түүний унаж явсан машиныг илрүүлж, Техас руу зугтаж байсан замд нь баривчилсан байна. Гилдерийг баривчлах үед тэр хулгайлсан байж болзошгүй ээмгээ залгисан гэдгийг цагдаагийн алба хаагчид мэдээлжээ.
Түүнийг маск зүүж дээрэм хийсэн, 100 мянган ам.доллар ба түүнээс дээш үнэ бүхий эд зүйл хулгайлсан хэрэгт буруутгаж байгаа аж.
Гилдер өмнө нь 2022 онд Техас мужийн Вүүдлэнд дэх “Tiffany & Co” брэндийн дэлгүүрт үүнтэй төстэй хулгайн гэмт хэрэг үйлдэж байжээ. Мөн Колорадо мужаас түүний эсрэг 48 баривчлах тушаал гаргаж байсан аж.
