Халх голын дайнд ялсны 85 жилийн ойг угтан, “Халх гол-Яруу алдар бадартугай” олон улсын хээрийн судалгааны баг 5 дугаар сарын 15-нд Монголд ирсэн. Тус багийнхан Дорнод аймгийн Халхгол сумын Ремизовын толгод гэх газарт ажиллажээ. Тэд энэ сарын 23 хүртэл түүхийн судалгаа хийсэн талаар Улаанбаатар хот дахь Русский дом (РЦНК)-д өчигдөр уулзалт хийжээ.
ОХУ-ын 11 мужийн сайн дурын ажилтнууд, Москва, Пермь хот, Өвөрбайгалийн Их сургууль, Монгол Улсын их, дээд сургуулийн багш, оюутан, түүхч, судлаач нар уг багт ажилласан байна. Судалгааны явцад тэд Улаан армийн 27 цэргийн шарил олжээ. Халх голд байлдаж яваад сураггүй болсон 2000 орчим орос цэрэг байдаг бөгөөд тэдний 27-гийнх нь шарилыг ийн 85 жилийн дараа олсон нь энэ аж. Энэ удаагийн судалгаагаар олсон олдвороо Халхгол сумын “Ялалт” музейд энэ сарын 23-нд хүлээлгэн өгсөн байна.
