Шүд цоорох өвчний улмаас хүний биед 200 гаруй төрлийн өвчин, эмгэг үүсдэг. Гэтэл манай улсад 10 хүүхэд тутмын ес нь шүдний өвчтэй байна.
Насанд хүрэгчдийн дунд амны эвгүй үнэр нь дасал болсон нэлээд элбэг тохиолддог эмгэг бөгөөд хоол хүнс ба шүд, буйлны өвчний шалтгаантай байх нь элбэг. Гэвч харамсалтай нь амны эвгүй үнэр нь хүүхдүүдийн дунд ч ховор бус тохиолдож байна.
Эвгүй үнэрийн шалтгаан
Хүүхдийн амны эвгүй үнэрийн шалтгаан нь том хүнийхээс төдийлөн ялгаатай бус. Калифорни муж улсын Хүүхдийн Эрүүл мэндийн төв хүүхдийн амны хөндийн эвгүй үнэрийн шалтгаан болох зүйлсэд дараах зүйлүүдийг хамруулсан байна.
- Шүдний өвчин: Цоорол, буйлны үрэвсэл, шүдний завсар хавчуулагдсан хоол хүнсний зүйлс;
- Халдварын голомт: Хамар залгиурын, гүйлсэн булчирхайн, хамрын дайвар хөндийн үрэвсэлүүд;
- Хуурайшсан ам: Шалтгаан нь биеийн шингэн дутагдсан эсвэл амаар хэт их амьсгалсаны улмаас;
- Хоол хүнс: Хурц үнэр ялгаруулдаг хоол хүнс;
- Биеийн эрүүл мэндийн асуудал, өвчин: Тухайлбал, хоолны шингэц муудах, ходоод ба элэгний өвчин эмгэг;
Хэрхэн эмчлэх вэ?
Өдөр бүр тотмол цагт шүдээ угаах, шүдний завсарыг утсаар цэвэрлэх нь амны хөндийд тогтсон элдэв эвгүй үнэрийг арилгах хялбар бөгөөд үр дүнтэй аргачлал юм. Хэрэв хүүхэд илтээр ямар нэгэн халдварын голомтот үрэвсэл агуулж байгаа нь халуурах, хамраас нус гойжих, өвдөх шинж тэмдэгээр илрэж байвал халдварын шалтгаан болж буй хүчин зүйлийг арилгаж, шүд, буйлыг цэвэрлэж хэрэгтэй. Хүүхдийн шүдийг угаахдаа хүүхдэд зориулсан жижиг, зөөлөн үстэй сойз ашиглах хэрэгтэй.
Америкийн Шүдний Эмч Нарын Холбоо хүүүхдийн шүдийг угаахын зэрэгцээ хэлийг хамтад нь угаах нь амны эвгүй үнэртэй тэмцэх чухал аргачилал болохыг зөвлөдөг. Учир нь хүүхдийн хэлэн дээр төрөл бүрийн нян бактери хуримтлагдаж байдаг. Хүүхдэд өдөр тутамд хангалттай хэмжээний ус уулгаж шингэн нөхөж байх нь биеийн шингэн дутасгдсаны улмаас ам хуурайших, шөнө амаа ангайж унтах эрсдлийг бууруулна.
Хэрэв эдгээр энгийн аргуудыг хэрэглээд ч амны эвгүй үнэр арилахгүй бол заавал шүдний эмчид үзүүлээрэй.
Урьдчилан сэргийлэлт
Оройн унтахын өмнө шүдээ маш сайн угаадаг дадал хэвшлийг хүүхдэдээ суулгаж өгөх нь амны эвгүй үнэр дахихаас сэргийлэх найдвартай арга юм. Америкийн Хүүхдийн Шүдний Эмч нарын Холбоо эцэг эхчүүдэд хүүхдээ 7 ба 8 нас хүртэл шүдээ угаахад нь хяналт тавьж туслаж байхыг зөвлөдөг.
Хүүхдийн шүдийг өдөрт хамгийн багадаа хоёр удаа, өглөөний цайны дараа ба үдэш унтахын өмнө угааж өгч байх хэрэгтэй. Мөн хүүхдээ 6 сар тутам шүдний эмчид дагуулан очиж амны хөндийн эрүүл мэндийн үзлэг, оношлогоо хийлгэж байх нь чухал.
