Сүүлийн үед цагдаа нарын холбогдоод буй гэмт хэрэг нийгмийг цочроогоод байгаа юм. Гэвч Монгол улсад үүрэг гүйцэтгэж буй 12000 мянга орчим цагдаагийн албан хаагч бүгд тийм биш нь үнэн юм. Тэдгээрийн тод жишээ болохуйц үйл явдал өчигдөр болжээ. Цагдаагийн байгууллагын дэслэгч Б.Бямбажав амиа хорлох үйлдэл хийж байсан иргэнийг таслан зогсоож, амь насыг нь аварчээ.
Цагдаагийн байгууллагад энэ оны 04 дүгээр сарын 10-ны өдрийн 16 цаг 20 минутад Сүхбаатар аймгийн Баруун-Урт сумын иргэнээс “Салсан нөхөр маань амиа хорлоно гээд 20 минутын өмнө ярьсан, автомашинтайгаа аймгийн хойд зүг рүү явж байгаа” гэх мэдээлэл ирүүлсэн.
Дуудлага, мэдээллийн дагуу Сүхбаатар аймгийн цагдаагийн газрын алба хаагчид шуурхай ажиллагаа зохион байгуулан Замын цагдаагийн тасгийн зохицуулагч, цагдаагийн дэслэгч Б.Бямбажав нь тухайн иргэнийг аймгийн төвөөс 2 километрийн хойд зүгт байрлах өндөр хүчдэлийн шонгоос өөрийгөө боомилох үйлдэл хийж байсныг таслан зогсоож, амь насыг нь аварчээ.
