55 настай дуучин Селин Дион хөгжмийн хамгийн том үдэш болох Грэммийн шагнал гардуулах ёслолын үеэр тайзнаа эргэн ирлээ.
66 дахь удаагаа зохион байгуулагдаж буй энэхүү наадмаас “Оны шилдэг цомог” шагнал хүртсэн Тэйлор Свифтэд шагнал гардуулсан. Тэрээр “Би энд байгаадаа чин сэтгэлээсээ маш их баяртай байна” хэмээсэн бөгөөд 27 жилийн өмнө Диана Росс, Стинг нараас Грэммийн шагнал гардан авч байснаа дурсан ярьжээ.
Селин Дион нь 2022 онд сая хүн тутамд ганц тохиолддог ховор төрлийн мэдрэлийн өвчнөөр өвчилсөн тухайгаа олон нийтэд мэдээлсэн. Үүнээс хойш нам гүмхэн байсан. Өвчний улмаас түүний их бие болон мөчдийн булчин чангарч, хатингаршиж эхэлсэн бөгөөд өнгөрсөн арванхоёрдугаар сард түүнийг булчингаа хянаж чадахаа больсон тухай түүний эгч мэдээлж байсан .
Өнгөрсөн хугацаанд өвчинтэйгөө тэмцэж, тайзнаа эргэн ирэхийг мөрөөдөж байсан тэрээр ийнхүү Грэммийн тайзнаа гарч ирсэн бөгөөд танхим дүүрэн үзэгчид түүнд баяр хүргэн хүндэтгэл үзүүлжээ.
