Ираны нэрт генерал Касем Сулеймани нас барсны дөрвөн жилийн ойн гашуудлын үеэр буюу 2024 оны нэгдүгээр сарын 3-нд түүний булшны ойролцоо дэлбэрэлт болсны улмаас 103 хүн нас барж, 211 хүн шархадсан талаар https://ria.ru/20240103/terakt-1919618413.html эх сурвалжийг ашиглан Стратеги судалгааны хүрээлэнгийн мэдээллийн нүүр хуудаст мэдээлжээ. Ираны эрх баригчид уг дэлбэрэлтийг “террорист халдлага” хэмээн нэрлэж байгаа аж. Дэлбэрэлт хоёр үе шаттай явагдсан бөгөөд эхний дэлбэрэлт орон нутгийн цагаар 15:00 цагийн орчимд болж, цагдаа түргэн тусламж аврагчид болон энгийн хүмүүс тусламж үзүүлэхээр ослын газарт бөөгнөрөх үед буюу 15:20 цагийн үед дахин хоёр дахь дэлбэрэлт болсон нь илүү олон хүн хохироход хүргэжээ.
Ираны Засгийн газар нэгдүгээр сарын 4-ний өдрийг дэлбэрэлтийн үеэр амь үрэгдэгсдэд зориулан үндэсний гашуудлын өдөр болгон зарласан бөгөөд Ираны Ерөнхийлөгч Эбрахим Раиси “Буруутай хүмүүсийг олж хатуугаар шийтгэнэ” гэдгээ мэдэгдэж байна.
ОХУ-ын Ерөнхийлөгч Владимир Путин Ираны Ерөнхийлөгч Эбрахим Раиси болон Ираны оюун санааны удирдагч Аятолла Али Хаменеи нарт эмгэнэл илэрхийлсэн бол НҮБ-ын Ерөнхий нарийн бичгийн дарга Антонио Гутерриш, Европын Холбооны Гадаад харилцаа, аюулгүй байдлын бодлого хариуцсан дээд төлөөлөгч Жозеп Боррелл уг дэлбэрэлтийг эрс буруушааж буйгаа мэдэгджээ. Харин АНУ, Израиль улс “дэлбэрэлтэд холбоогүй” гэдгээ мэдэгдэв.
