НҮБ-ын Энхийг сахиулах ажиллагаанд монгол хүнийг оролцуулах боломжийн талаар 1993-1994 оны үед анх судалж байжээ. Энэхүү судалгаа Стратеги судалгааны хүрээлэн сэтгүүл дээр анх хэвлэгдэж байсан цагаас 30 жилийн дараа монгол цэрэг НҮБ-ын энхийг сахиулах хүчний маш нэр нөлөө бүхий хэсэг нь болж чаджээ.
Саяхан НҮБ-ын ерөнхий нарийн бичгийн дарга А.Гутерреш НҮБ-ын Кипр дахь энхийг сахиулах хүчний командлагчаар генерал Б.Эрдэнэбатыг томилсон юм. Өөрөөр хэлбэл, нэг улсыг хариуцсан бүхэл бүтэн командлалыг монгол хүн удирдахаар томилогджээ. 2002 оноос монголчууд энхийг сахиулах үйл ажиллагаанд оролцож эхэлсэн бөгөөд өдгөө алба хаагчийнхаа тоогоор тэргүүлдэг хориод орны нэг болсон.
Анх хоёр цэргийн ажиглагчийг Бүгд Найрамдах Конго улс руу илгээснээс хойш Судан, Афганистан, Сьера Леон, Йемен гээд дэлхийн халуун бүсүүд рүү монголчууд очиж энхийг сахиулах болсон юм. Тэр дундаа хамгийн авхаалжтай, ур чадвартай нь гэгдэж ирсэн.
Монгол Улсын 193 дахь генерал Б.Эрдэнэбатын хувьд 2004 онд Иракийн хоёрдугаар ээлжинд анх явж байсан бөгөөд найман удаа энхийг сахиулах үйл ажиллагаанд оролцож байсан нэгэн аж. Өмнөд Суданд 2008-2009 онд 850 цэрэг удирдаж, 2013-2014 онд батальоны захирагчаар ажиллаж байсан байна. Тэр үеэс олон улсын цэргүүдийг удирдаж ажиллах дээр улам бүр туршлага хуримтлуулсан аж.
АНУ-ын Агаарын цэргийн хүчний Команд штабын коллеж, Дайны коллежид суралцаж байсан нь түүнд удирдлагын түвшинд шийдвэр гаргах, стратегийн түвшинд асуудлыг хардаг болгосон биз ээ. Монголын зэвсэгт хүчинд гуч гаруй жилийн турш алба хааж ирсэн тэрбээр 2021 онд генерал цол хүртсэн бөгөөд энхийг сахиулах үйл ажиллагаанд оролцож байхдаа цэргийн дээд цолоор шагнуулсан анхны алба хаагч болж байсан гэдэг.
