АНУ-ын Ерөнхийлөгч Дональд Трамп Хятадын дарга Ши Жиньпинтэй 10-р сарын 30-нд Өмнөд Солонгост уулзана. Хоёр удирдагчийн уулзалт АНУ-ын Ерөнхийлөгчийн Азид хийх айлчлалын төгсгөлд болох бөгөөд айлчлал Малайзаас эхэлж, Японд үргэлжилж, энэ жилийн Ази, Номхон далайн эдийн засгийн хамтын ажиллагааны (APEC) дээд хэмжээний уулзалт болж буй Өмнөд Солонгост өндөрлөнө.
Дэлхийн хамгийн том хоёр эдийн засагтай хоёр гүрний харилцаа сүүлийн саруудад доод түвшинд хүрээд байсан юм. Хятад стратегийн ховор элементийн хяналтаа чангатгана гэж сүрдүүлсэн бол АНУ чухал програм хангамжийн тарифыг нэмэгдүүлж, хяналтаа өргөжүүлнэ гэж анхааруулаад байсан юм.
Худалдааны дайн дэгдэж байгаатай холбогдуулан Трамп уулзалтыг цуцална гэж сүрдүүлж байсан ч ирэх лхагва гарагт “бүх зүйл дээр” тохиролцоонд хүрнэ гэж найдаж байгаагаа илэрхийлээд байна. Уулзалт болохоос өмнө АНУ болоy Хятад улс хэд хэдэн хурцадмал байдлыг намжаах түр суурь ойлголт дээр нэгдмэл саналд хүрсэн. Үүнд:
- АНУ-ын зүгээс 11-р сарын 1-нээс эхлэн Хятадын импортын бараанд ногдуулахаар төлөвлөсөн 100 хувийн тарифыг тавихгүй байхаар тохиролцов.
- Хятад улс ховор элементийн экспортын хяналтаа нэг жилийн хугацаагаар хойшлуулах төлөвлөв.
- Хятад улс Америкийн шар буурцаг болон бусад хөдөө аж ахуй бүтээгдэхүүний томоохон худалдан авалтыг сэргээхээр амласан.
- Хоёр улс АНУ-ын фентанилийн хямралыг шийдвэрлэхэд хамтран ажиллахаар болсон.
- TikTok програмын АНУ-дахь хувилбарыг Америк хөрөнгө оруулагчдад шилжүүлэх эцсийн хэлэлцээр энэхүү суурь баримт бичгийн нэг хэсэг болсон. Эдгээр нь дахин сэргэж болзошгүй худалдааны зөрчилдөөнөөс ухрах алхам боловч, дээд хэмжээний уулзалтын үеэр хоёр удирдагчаар эцэслэн баталгаажуулах шаардлагатай байгаа түр тохиролцоо юм.
