Мадагаскарын Ерөнхийлөгч Эндри Ражоелина өөрийг нь огцрохыг шаардсан эсэргүүцлийн жагсаалын дараа, амь насанд нь халдах оролдлого хийснийхээ дараа аюулгүй газар хоргодож байгаагаа мэдэгдсэн байна. Тэрээр фэйсбүүкээр ард түмэндээ хандан шууд нэвтрүүлэг хийхдээ “Хэсэг цэргийн албан хаагчид болон улс төрчид намайг алахаар төлөвлөж байсан” гэж мэдэгджээ.
Эндри Ражоелина өөрийгөө хаана байгаагаа хэлээгүй бөгөөд батлагдаагүй мэдээллээр түүнийг Францын цэргийн нисэх онгоцоор эх орноосоо зугтсан гэж таамаглаж байгаа юм. Түүнийг эрх мэдлээс нь унагах зорилготой “Gen Z Mada” гэх залуу жагсагчид орон даяар жагсаал өрнүүлсэн бөгөөд Ражоелина эсэргүүцэгчдийг тайвшруулах гэж засгийн газраа бүхэлд нь огцруулж, бусад буултуудыг хийсэн ч үр дүнд хүрээгүй юм.
Ийм үйл явдал яагаад болсон бэ гэвэл, хэдийгээр Мадагаскар улс Байгалийн баялаг ихтэй ч Мадагаскар дэлхийн хамгийн ядуу орны нэг байсаар байгаа юм. Хүн амын 75 орчим хувь нь ядуурлын шугамаас доогуур амьдарч байгааг Дэлхийн банк мэдээлсэн бол Олон улсын валютын сангийн (ОУВС) мэдээллээс харахад хүн амын зөвхөн гуравны нэг нь цахилгаан эрчим хүчээр хангагдсан байна.
Энэхүү эсэргүүцлийн жагсаал ус, цахилгааныг удаа дараа тасалсны улмаас эхэлсэн бөгөөд дараа нь ажилгүйдэл, авлига, амьжиргааны өртөг хямралын улмаас гарсан байна.
НҮБ-ын мэдээлснээр жагсаалын эхний хэдэн өдөрт 22 хүн амиа алдаж, 100 гаруй хүн шархадсан гэж үзсэн боловч Мадагаскарын засгийн газар үүнийг няцаасан байна. Мадагаскар улс 1960 онд тусгаар тогтнолоо олж авснаас хойш олон удаа бослого гарсны дотор 2009 онд тухайн үеийн Ерөнхийлөгч Марк Раваломанана огцорч, Ражоелина ерөнхийлөгч болж байсан юм.
