Хятадын шүүх Мьянмар дахь луйврын төвүүдийг ажиллуулдаг Мин овогт гэр бүлийн 39 гишүүнд ял оноолоо. Эндээс 11 гишүүнд нь цаазын ял, 11-д нь бүх насаар хорих ял, тавд нь хоёр жилийн дараа хэрэгжих цаазын ял, үлдсэн хүмүүст нь 5-24 жилийн хорих ял тус тус оноожээ.
Мин овогт гэр бүл нь Мьянмарын Хятадтай хиллэдэг Лауккай гэх хотыг мөрийтэй тоглоом, хар тамхи, луйврын төв болгон хувиргасан дөрвөн овгийн нэг юм. Мьянмар улс 2023 онд хатуу арга хэмжээ авч, эдгээр гэр бүлийн олон гишүүнийг баривчлан, Хятадын эрх баригчдад хүлээлгэн өгч байжээ.
Гэр бүлийн толгойлогч Мин Сючан нь амиа хорлосон бөгөөд бусад гишүүнийг Хятадын засгийн газарт хүлээлгэн өгсөн нь энэ юм.
Шүүхийн олж тогтоосноор Мин овогт гэр бүл болон бусад гэмт бүлэглэлүүд 2015 оноос хойш харилцаа холбооны луйвар, хууль бус казино, хар тамхины наймаа, биеэ үнэлэлт зэрэг гэмт хэрэгтэй холбогдэжээ. Тэд мөрийтэй тоглоом болон луйврын ажиллагаанаас 10 тэрбум юанийн ашиг орлого олсон ажээ. Цаашилбал, тэднийг луйврын төвийн хэд хэдэн ажилтны үхэлтэй холбоотой болохыг тогтоосон байна. Тухайлбал, Хятад руу буцаахгүйн тулд ажилчдаа буудаж хөнөөсөн хэрэг нэг удаа гарч байжээ.
Мин гэр бүл нь нэгэн цагт Мьянмарын Шан мужид хамгийн хүчирхэгт тооцогддог байв. Лауккай дахь луйврын төвүүд нь дор хаяж 10 мянган ажилтантай байсан гэдэг.
Хятад болон бусад хөрш зэргэлдээ оронд казино хууль бус байдаг. Үүнийг далимдуулан Лауккайд энэ төрлийн бизнес цэцэглэж, олон төрлийн луйврын ашигтай талбар болсон юм. Тэр бүү хэл НҮБ Лауккайг дэлхийн томоохон луйврын сүлжээний гол төв гэж үздэг аж.
ЭХ СУРВАЛЖ: BBC
