УИХ-ын Нийгмийн бодлогын байнгын хорооны өнөөдөр/ 2025.04.22./ хуралдлаа. Энэ үеэр Эрүүл мэндийн даатгалын зөвлөлийн даатгуулагчийг төлөөлөх шинэ гишүүнийг томилох нээлттэй сонсгол болжээ.
Байнгын хорооны хуралдааны үеэр УИХ-ын гишүүн Ж.Баясгалан “Би орон нутагт ажиллаад ирсэн. Хэд хэдэн аймгийн эмнэлэгт очлоо. Сумын эмнэлэгт өглөө 8 цагт ажилдаа ирдэг хүн алга, тэнд байдал их хэцүү байна. Эмч нар нь хувийн дансаараа иргэдээс мөнгө авч байна. Харуул хамгаалалтгүй байна. Эмнэлгийн ажилтнууд,өвчтөнүүд нэг өрөөнд хамт хэвтдэг юм байна.
Иймд иргэд арга буюу аймгийн эсвэл нийслэлийн эмнэлгийг бараадаж байна. Сумын эмнэлгүүдийн санхүүжилтийг нэмэх тал дээр Эрүүл мэндийн даатгалын сандаа анхаарна уу. Хатуухан хэлэхэд, сумын эмнэлэгт очиход эмнэлэг үү, зочид буудал уу гэдэг нь ялгагдахгүй байна. Шөнийн 12 цагт очиход сумын эмнэлэгт нэг ч эмч байгаагүй. Гаднаас ирсэн хүмүүсийг өвчтөнүүдтэйгээ нийлүүлээд, хүлээн авах өрөөндөө унтуулдаг. Тэр мөнгөө эмч нь хувийн дансандаа авсан. Энэ нь тэр эмнэлэгт хэвтэн эмчлүүлж буй хүмүүст их хор уршигтай. Ийм дампуу болжээ. Мөнгө олох зорилготой бол өөр байранд хүмүүсийг унтуулах хэрэгтэй. Эрүүл мэндийн даатгалын зөвлөл өрхийн эмнэлгүүд, сумын эмнэлэгт очиж ажиллах хэрэгтэй байна” хэмээлээ.
