Өнөөдрийн Засгийн газрын хуралдаанаас ирэх 2026 оныг “Боловсролыг дэмжих жил” болгон зарлажээ. Энэ шийдвэрийг Боловсролын сайд П.Наранбаяр танилцуулж, зургаан шинэчлэлийг төгөлдөржүүлнэ хэмээлээ.
Сайд хэлэхдээ “Багшийн дутагдлаас гаргах, багшийг хөгжүүлэх хөтөлбөрүүдийг нэмэгдүүлнэ. Боловсрол хүний нөөцтэй шууд холбоотой. Манай улсад хүний нөөцийн ноцтой дутагдал үүслээ. Тиймээс хэд хэдэн шинэчлэлт хийнэ. Хөтөлбөрийн шинэчлэлт, цахим шинэчлэлт, санхүүгийн шинэчлэл, багшийн гурван тулгуурт шинэчлэлт гээд хэд хэдэн шинэчлэлт хийнэ. Мөн Хүний нөөцийн асуудалд анхаарал тавьж ажиллана. Боловсролыг дэмжих жил бол эдийн засгийг өөрийг нь дэмжих, салбар дундын уялдаа холбоог шинэчлэх жил байх болно” гэлээ.
Түүний хэлснээр 2030 он гэхэд 88 мянган сургуулийн насны хүүхэд улс даяар нэмэгдэх юм байна. Тиймээс 108 сургууль 95 цэцэрлэг хэрэгтэй гэсэн тооцоо гарчээ. Хүн амын нягтаршлыг гаргахдаа хаана, хэдэн сургууль, цэцэрлэг хэрэгтэйг хиймэл оюун ухаан ашиглан тооцоолжээ.
Боловсролын салбарын шинэчлэл бол өнгөрсөн 30 жилийн алдаатай бодлогыг бүхэлд нь өөрчилж байж өөрчлөгдөхөөс бас тийм ч амар өөрчлөгдөх боломжгүй. Гэтэл реформын чанартай өөрчлөлт хийх гэхээр олон нийт ойлгохгүй, попууд буруу тийш авч давхих гээд байдаг гэмтэй. Тиймээс Засгийн газар ганц салбарын жил болгож нэр тавихаас илүүтэй дэмжсэн шиг дэмжих хэрэгтэй, олон нийт бас хүлээцтэй ойлгох хэрэгтэй.
Түүнээс нэг зүйл ярихаар өндөг шидээд байх юм бол өөрчлөлт шинэчлэлт ирэхгүй. Угаасаа нэг ангид маш олон хүүхэд суралцдаг, багшийн хомсдолд орчихсон энэ асуудлыг шийдэхгүй бол урагшаа явах боломжгүй болсон. Тиймээс төр засаг дэмжсэн шиг дэмжиж, олон нийт ойлгосон шиг ойлгохгүй бол хоосон тэрнийг дэмжих, үүнийг дэмжих жил гэсэн нэр тавиад ахиц гардаггүй шиг зүйл болоод өнгөрнө. Иргэн бүрийн амьдралд хүүхдүүдийн боловсрол чухал учраас бүгд нэг зүгт харж дэмжээд өгвөл сургуулийн чанар захын сургууль, хөдөөгийн сургууль гэлтгүй чанартай болно. Хамгийн энгийндээ сургууль амрахаар түгжрэл багасдаг шиг гэрийнхээ дэргэд чанартай сургуульд хүүхдүүд суралцаад ирвэл түгжрэл хүртэл багасана шүү дээ.
