Дэлхий даяар 4-р сарын 2-ны өдрийг Дэлхийн Аутизмын Өдөр болгон тэмдэглэж, 4-р сарын турш аутизмыг таниулах үйл ажиллагаануудыг зохион байгуулдаг билээ.
Монголын Аутизмын Холбоо НҮТББ, Аутизм Монгол Анд НҮТББ, АНА Монгол төв, Тэмүүлэл Аутизм төв хамтран аутизмтай хүүхэд, насанд хүрэгч, тэдний гэр бүлд, боловсролын байгууллагад чиглэсэн байгууллагуудаас нэг дор мэдээлэл авч болох “Autism Fair” мэдээллийн яармагийг өнөөдөр /2025.04.02/ ONE Event Hall-д зохион байгуулж байна.
Түүнчлэн АХЭ-тэй хүүхдүүд ба насанд хүрэгчдэд тулгардаг оношилгоо, үнэлгээ, халамж, боловсрол, эрүүл мэнд гэх зэрэг асуудлаар мэдээллийг нэгэн доор, нэгэн цэгээс, нэг өдөрт үнэ төлбөргүй авах аж.
Яармагт ирснээр оролцогч байгууллагууд аутизмтай хүүхдүүд ба насанд хүрэгчдэд зориулсан үйл ажиллагаа, үйлчилгээ, бүтээгдэхүүнээ таниулах, мэдээлэх, сурталчлах, зөвлөгөө өгөх, чиглүүлэх өөр өөрсдийн булангаа бүтэн өдрийн турш нэгэн зэрэг ажиллуулах юм.
