Сургуулийн менежментийг сайжруулах төслийн 3 дугаар шат үргэлжилж байгаа билээ. Төслийн энэ шатанд сум, аймаг, нийслэлийн 120 сургууль хамрагдаж буй юм.Төслийн явцыг газар дээр нь хэрхэн явагдаж байгаатай танилцахаар нийслэл болон орон нутагт томилолтын багийнхан ажилласаар байна.
Төсөлд хамрагдаж буй сургуулиудын удирдлагуудын үр дүнгийн сэтгэгдлүүдийг түүврээр хүргэж байна.
Сургуулийн менежмент бол асуудлаа тодорхойлоод, шийдлээ үе шаттайгаар хэрэгжүүлэх энгийн процесс юм гэдгийг ойлгоод байна
2023-2024 онд Боловсролын ерөнхий газраас сургуулийн менежментийг сайжруулах жил гэж зарласан шүү дээ. Энэ хүрээнд Сургуулийн менежментийг сайжруулах төслийн 3 дугаар шатны шалгаруулалтад тэнцсэндээ маш их баяртай байгаа.
Анх менежментийн тухай ямар ч ойлголтгүй байлаа. Харин төсөлд хамрагдсаны үр дүнд менежмент бол хамгийн энгийн зүйл юм байна гэдгийг ойлгосон. Бид тулгараад буй бэрхшээл, асуудлаа тодорхойлоод, шийдлээ үе шаттайгаар хэрэгжүүлээд явах нь менежмент юм байна. Тиймээс менежмент бол энгийнээс эхлээд асар том зүйлийг ч хэрэгжүүлж болохоор зүйл байна гэж харж байгаа.
Төслийн эхэн үед тулгарч байсан бэрхшээлүүд гэвэл багш нарын хандлагыг өөрчлөхөд бэрхшээлтэй байсан. Багш нар маань ажил дээр ачаалал нэмж байна гэж ойлгосон. Багт хуваагаад ирэхээр багшийн ачаалал буурна, багаараа хамтраад ажиллахаар багш нарын ачаалал багасна гэдэг нь аяндаа мэдэгдээд, багаар ажиллаад явах нь үр дүнтэй юм байна гэдэг шийдэлд хүрээд, ойлголцоод ажиллаад эхэлсэн.
Хөрөнгө мөнгө зарахгүйгээр энгийн элементүүдийг ашиглаад хүүхдүүддээ өдөр тутмын зөв дадал сургаж байна
Сургуулийн менежментийг сайжруулах төсөлд манай сургууль хүсэлтээ гаргаад 3 дугаар ээлжид нь хамрагдаж байгаадаа баяртай байна. Төслийн ачаар нарийн чимхлүүр, маш олон зүйлийг сурч байгаа.
Намраас хойш төслийн хүрээнд нэлээдгүй олон сургалтад хамрагдсан. Сургалтаас мэдэж сурсан зүйлээ өөрийн сургуулийн нөхцөлд, хөрсөн дээр нь буулгаж ажиллахыг эрмэлзэж байна. Жишээлбэл, Шинэ Монгол сургуулийн “Яг цагтаа” гэсэн урианаас сэдэл авч манай сургуулийн хамт олон “Яг цагтаа, бүгд цугтаа, бүхнийг хамтдаа” гэсэн уриатайгаар 7 жилийн турш ажиллаж байна. Хүүхдүүдээ зөв дадал хэвшилд сургахын тулд заавал их хөрөнгө мөнгө зарахгүйгээр маш энгийн жижиг зүйлсээр амьдралдаа баримтлах зан үйлийг зааж сургаж байна. Жишээ нь, сурагчдын хичээлээс хоцролтыг багасгахын тулд улаан шугам татсан. Хоцролт багасахын хэрээр багш нар төдийгүй хүүхдүүд маань хүртэл цагийн юмыг цагт нь хийдэг болсон сайн үр дүн гарсан.
Менежментийн хүрээнд сургуулиас үүдэлтэй сум даяараа эерэг өөрчлөлтүүд гарч эхэлж байна
Энэ намраас Сургуулийн менежментийг сайжруулах хөтөлбөрт хамрагдаж эхэллээ. Анхандаа ч юу нь менежмент билээ, яах билээ гээд самгардсан үе олон. Гэтэл энэ бол бидний мэдэхгүй зүйл, шинэ ойлголт огтоос биш. Өөрсдийн хийдэг ажлаа илүү цэгцтэй, төлөвлөлттэй, үр дүнгээ хяналттай хийхийг л хэлээд байсан юм байна.
Менежментээ сайжруулах, сургуулийн үйл ажиллагааг оновчтой болоход хамгийн гол нь удирдлагын баг нэгдэх, манлайлал үзүүлэх нэлээн гол түлхэц болдог юм байна.
Жишээ нь өглөө бүр би түрүүлж ирээд хүүхдүүдтэй мэндэлдэг болоход сурагчид маань “Захиралтай мэндлэхээс хоцрох вий дээ, өрөөндөө орчих вий” гэж яарч ирдэг болжээ. Сумын бусад байгууллагууд ч “Сургуулийнхан ямар гоё мэндэлдэг болоо вэ,бид нар ч мэндэлбэл зүгээр юм биш үү” гээд л сургуулиас үүдэлтэй суманд хүртэл өөрчлөлт гарч эхэллээ.
Хоёрдугаарт, менежментийн хөтөлбөр хэрэгжээд иртэл багш нар, ажилтнууд маань ч илүү ажил хэрэгч болоод “Энд нэг асуудал байна аа, яаж шийдэх вэ” гэдэг яриа коридорт зөрөхдөө ч ярьдаг болжээ.
Багш бүрийн хандлага маш богино хугацаанд эерээгээр өөрчлөгдөж “Яавал илүү сайжрах вэ?” гэдэг асуултыг л бие биедээ тавьдаг болсон гээд зүрх сэтгэлд нь гарсан өөрчлөлтийг үгээр илэрхийлэхийн аргагүй ээ. Энэ л жижиг өөрчлөлтөөс чанартай боловсрол эзэмшсэн, хүмүүжил төлөвшилтэй төгсөгчийг бий болгож чадна гэсэн итгэлээр манай хамт олон нэгдэж, ажиллаж байна.
Асуудлаа оношилсон юм чинь урагшилна, ахихын төлөө хичээнэ
Яагаад сумын сургуулиас дэлхийн хэмжээний хүн төрж болохгүй гэж, яагаад хотын сургуулиас дутах ёстой гэж, нэгэнт туршсан менежментийг хэрэгжүүлье гэж Шинэ Монгол сургуулийн төслийн багт хандсан. Төсөлд хамрагдахаас өмнө их л додигор байв. Манай сургууль салбарынхаа үйл ажиллагааны үнэлгээгээр аймгийнхаа 31 сургуулиас эхний таван байраас бууж үзээгүй. Тийм учраас өөрсдийгөө болж байна л гэж эндүүрч явсан байна лээ.
Гэтэл дотор нь төсөлдөө хамрагдсаны дараа захирлын ажлыг мэддэг гэж бодож явсан бардам зан шалан дээр унасан, менежментийн хувьд шал түүхий байжээ.
Асуудал руугаа орсон, асуудлаа оношилсон.
Улам ч ихийг сурах ёстойгоо хамт олноороо ойлгоод эхнээсээ өөрчлөлт гаргаад эхэлсэн.
Холоос манай сургуулийг сэтгэл гарган зорин ирж сургалт зохион байгуулсанд талархал илэрхийлье. Бид маш их урам авлаа. Улам хичээнэ ээ.
