2024-2025 оны хичээлийн жилд Сургуулийн судалгаа хөгжлийн “Шинэ Монгол” ТББ-аас Төрийн өмчийн Ерөнхий боловсролын 120 сургуулийн менежментийг сайжруулахад дэмжлэг үзүүлж, зөвлөн тусалж байгаа юм. Хөтөлбөрт хамрагдаж буй 120 сургууль өнгөрсөн оны 10 сараас заавар, зөвлөмжөө авч эхэлсэн бөгөөд, богино хугацаанд үр дүнд хүрч, ашиг тусыг нь хүртээд эхэлжээ.
Үүнтэй холбоотойгоор төслийн талаарх сургуулиудын захирлуудаас авсан сэтгэгдлээс түүвэрлэн хүргэж байна.
СУРГУУЛЬ ХЭРХЭН АЖИЛЛАХ МЕХАНИЗМЫГ БҮХЭЛД НЬ ХЭЛЭЭД ӨГЧИХДӨГ НЬ ТӨСЛИЙН ДАВУУ ТАЛ
Төслийн давуу тал маш олон байна. Сургууль гэх байгууллага хэрхэн ажиллах ёстой вэ? удирдлагын баг хэрхэн чиглүүлэг өгөх вэ? хамт олныхоо халуун дулаан уур амьсгалыг яаж урт хугацаанд хадгалах вэ? сурагчдаа хэрхэн хөгжүүлэх вэ? гэсэн асуултын хариултыг хөтөлбөрөөс олж, суралцаж байна. Базаад хэлэхэд сургууль хэрхэн ажиллах механизмыг бүхэлд нь хэлээд өгчихдөг.
Ихэнх сургуулийн алсын хараа, эрхэм зорилго бэлгэдлийн шинж чанартай тул бодит үр дүнд хүрэх нь ховор. Тиймээс бид сургуулийн удирдлагын баг, багш ажилчид, сурагч, эцэг эхчүүдтэйгээ хамтарч сургуулийнхаа онцлогийг нь бүрэн илэрхийлж чадах алсын хараа, эрхэм зорилгыг тодорхойлж чадсан. Ингэж хамтдаа ойлголтоо нэгтгэж гаргасан алсын хараа бүх үйл ажиллагааг чиглүүлж, тодорхой болгодог юм байна.
Одоогоор бид багш нараа багт нэгтгэснээс гадна, САТ, ТАТ-ынхөө хэрэгжилтэд анхаарч, хөтөлбөрөө амжилттай хэрэгжүүлж байна.
ОЙЛГОЛТОО НЭГТГЭСЭН ЦАГТ Л АЖЛУУД ЭМХ ЦЭГЦТЭЙ БОЛЖ, БАГШ АЖИЛЧДЫН
АЧААЛАЛ БУУРНА ГЭДГИЙГ ОЙЛГОЛОО
Нийгмийн ажилтан ажлаа хийх гэж байхад би нэг зүйл хий гэдэг, гэтэл менежер зэрэгцээд ажил даалгачихдаг үе гардаг шүү дээ. Ингэхээр тэр хүн чинь 3 ажлыг нэгэн зэрэг амжуулж чадахгүй төөрөлдөнө. Ингээд л ажил цалгардаж, удааширдаг. Заримдаа цагийг нь тулгадаг асуудал манайд төдийгүй бусад сургуульд ч гардаг байх. Харин “Сургуулийн менежменийг сайжруулах төсөл”-ийн чиглүүлэгч багш нарынхаа зөвлөсний дагуу өдөр тутам, сар тутмын ажлаа төлөвлөж эхэлснээр ажлууд “мөргөлдөхгүй” илүү эмх цэгцтэй болсон.
Багш нар төсөлд хамрагдсанаас хойш багаар хамтран ажиллаж, өөрсдийнх нь ажлын ачаалал буурч, төвөггүй хийдэг болсон гэдгээ хэлдэг болсон. “Өнөөдөр чинь ямар их ажил амжуулчхав аа! Өмнө нь ганцаараа сэтгэл зовоод л, урагшгүй байгаад байдаг байсан” гэх нь ч бий. Тухайлбал, манай биеийн тамирын багш тэмцээн уралдаан зохион байгууллаа гэхэд өмнө нь бүх ажлаа өөрөө амжуулдаг, гэхдээ их ачаалалтай ажилладаг байсан. Харин одоо биеийн тамирын багштай нэг баг болсон багш нар бүгд хамтран ажиллаж, ачааллаа тэнцвэржүүлдэг.
Төсөлд хамрагдсанаас хойш удирдлага, багш, ажилтнууд үнэт зүйлээ тодорхойлж, нэг зүйлд зорих буюу ойлголтоо нэгтгэх нь юунаас ч илүү чухал гэдгийг ойлгож байна. Гагцхүү үүний дараагаар л үр бүтээмжтэй байдал, багш сурагчийн хөгжил, сургуулийн амжилтад ахиц гарах юм.
Манай хамт олон хөтөлбөрийн үр дүнг эергээр төсөөлж байгаа. Төсөл дуусахад бид сургуулийнхаа менежментийг сайжруулчихсан, суралцагч, багш бүр дадал соёлоо хэвшүүлээд дадчихсан, нэг зорилготой, нийтэч хамт олон болсон байх болно гэдэгт итгэж байна.
ЭНЭ ХӨТӨЛБӨР ГАНЦХАН ЖИЛИЙН ХУГАЦААНД ХЭРЭГЖЭЭД ӨНГӨРӨХ ЗҮЙЛ БИШ ЮМ
Манай сургууль эерэг хандлага төлөвшилтэй сурагчидтай болох, багш нараа хөгжүүлэх, сургуулийн ажилтнуудаа нэг зорилготой болгох зорилт тавьдаг ч хэрхэн зорилгодоо хүрэх гарцаа олохгүй байсан. Яг тэр үед төсөлд хамрагдаж, Шинэ монгол сургуулийн туршлагаас судалж, хийх аргаа олсон.
Бид төслөөс хуримтлуулсан туршлага дээрээ суурилан багш нараа багт нэгтгэн үеийн багш нарыг бий болгож, ээлжлэн үйл ажиллагаануудаа хариуцаж зохион байгуулдаг болсон. Эдгээр ажлын нэг нь жижүүр анги юм. 7 хоног бүр ээлжилж нэг анги давхар бүрд жижүүрлэн бусад сурагчдадаа сургуулийн соёлыг таниулж, багш, эцэг эх, удирдлагад мөн зааварчилгаа өгч, чиглүүлдэг. Энэ бол манай сургуулийн нэг брэнд ажил.
Багш нар маань сурагчдаа “тэг, ингэ” гэхээс илүү хүүхэд нэгэндээ нөлөөлөх нь илүү үр дүнтэй байдаг юм байна. Ингээд зогсохгүй бусдыгаа уриалж буй сурагч хүртэл сургуулийнхаа талаар мэддэг, дадал хэвшлээ мөрддөг болчихдог. Хүүхдүүдээ өөрчилчих юм бол багш нар бид ч дагаад өөрчлөгдөх шаардлагатай болдог юм билээ.
Анх шинэ төсөл хэрэгжүүлнэ гэхэд төвөгшөөх байдалтай, их ажлын хажуугаар дахиад ажил нэмэгдэж байна харж байлаа.
ЕБС-иудад жил бүр л болсон болоогүй олон төсөл хөтөлбөр хэрэгждэг шүү дээ. Тэдний нэг л гэж бодож байсан. Одоо бол энэ хөтөлбөрийг нэг жилийн хугацаанд хэрэгжээд өнгөрөх зүйл гэж харахгүй байна.
Цаашид энэ хөтөлбөрөө сургуульдаа сайн туршлага болгож, дадал хэвшлээ мөрдүүлнэ.
