Тайландын түүхэнд байгаагүй хамгийн том романс залилангийн хэрэгт холбогдсон эмэгтэйг Тайландын Хат Яй олон улсын нисэх онгоцны буудлаас баривчилжээ. Тайландын Мөрдөн шалгах товчооныхон 52 настай эмэгтэйг өнгөрсөн Бямба гаригт /2025.02.01/-нд Малайзын онгоцноос буухад нь ийнхүү баривчилсан байна.
Тэрээр Афганистанд ажиллаж байсан АНУ-ын армийн эмчийн хуурамч “LinkedIn” хаягийг ашиглан үндэстэн дамнасан компанийн Тайланд дахь салбарын санхүүгийн ахлах захирлыг хууран мэхэлж, компаниас нь 6.3 тэрбум батт буюу 186 сая ам.доллар залилжээ.
Хэрэгтэй холбоотойгоор тухайн захирал болон Тайланд, Нигерийн 100 орчим иргэнийг баривчлах тушаал гарчээ. Сэжигтэн эмэгтэйн нигер найз залуу нь Тайландад данс нээлгэх боломжгүй байсан тул түүнээс Тайландад данс нээлгэхийг хүссэн гэжээ. Тэд 2017 онд Малайзад танилцсан байна. Ингээд хоёр жил хамт амьдарсны эцэст нигер залуу Тайландад бизнес эрхэлмээр байгаа тул данс нээхийг эмэгтэйгээс хүсчээ. 2022 онд энэ эмэгтэй нь мөн романс залилангийн хэрэгт холбогдож байжээ.
Сэжигтэн эмэгтэйг романс залилангаас гадна нууц нийгэмлэгийн гишүүн, гэмт хэргийн бүлгийн гишүүн, үндэстэн дамнасан гэмт хэргийн байгууллагатай холбоотой мөн хувийн мэдээллийг хулгайлах замаар залилан мэхлэх гэмт хэрэгт холбогдсон, мөнгө угаах гэмт хэрэгт холбогдсон гэсэн үндэслэлээр эрэн сурвалжилж байжээ.
ЭХ СУРВАЛЖ: BANGKOK POST
