Дональд Трамп АНУ-ын Ерөнхийлөгчийн сонгуульд ялалт байгуулсан. Түүний тангараг өргөх ёслол ойртсоор байна. Тангараг өргөх ёслолынхоо өмнө Трамп Вашингтоны төвд орших “Capital One Arena” цогцолборт дэмжигчидтэйгээ уулзалт зохион байгуулж, түүний засаглал огт өөр байна гэдгийг зарлан тунхаглажээ. “Бид яллаа. Ерөнхийлөгчийн тангараг өргөсөн өдрөө л би маш олон зарлиг гаргах болно.
Манай орны нэр хүндийг унагаасан хүмүүсийг зайлуулж, Америкийг дахин агуу гүрэн болгоно. Маргааш үд дунд АНУ-ын уналтын урт удаан дөрвөн жилийн хөшгийг би хаана. Бид Америкийн хөгжил цэцэглэлт, бахархал, нэр хүндийн шинэ бүлгийг нээх болно” гэж тэрээр мэдэгджээ. Мөн хууль бус цагаачдын АНУ-ын газар нутагт хөл тавихыг зогсооно гэв.
Цагаачдад яг ямар арга хэмжээ авахаа ёслолын үеэр танилцуулна. Шинжээчдийн үзэж байгаагаар Трамп ажлын эхний өдөртөө 200 гаруй баримт бичигт гарын үсэг зурж, хуучин засгийн газрын бүх зүйлийг үгүйсгэх бололтой. Дональд Трамп мөн Газын зурваст энх тайван тогтоож чадсанаа гайхуулж, Украины дайныг зогсооно гэдгээ амалжээ.
