Залуу байгаль хамгаалагчдын “Экологи-Эрдэм клуб”-ээс Говийн Их Дархан Цаазат газрын амьтад болон экосистемийг хамгаалах үйлсэд ерөнхий боловсролын сурагчид, оюутан залуусын оролцоог нэмэгдүүлж, тэдний бүтээлээр олон нийтийн ойлголт хандлагыг нэмэгдүүлэх зорилгоор гар зураг, эсээ бичлэгийн уралдааныг зохион байгуулсан юм. Энэ уралдаанд хүүхэд залуус маш идэвхтэй оролцсон бөгөөд уран бүтээлийн үзэсгэлэнгээ өнгөрсөн өдрүүдэд Сүхбаатарын талбай дээр дэлгэн тавьсан юм. Хүүхэд залуус байгаль дэлхийгээ хамгаалж, ирээдүй хойч үедээ үлдээх ёстойг өөр өөрийнхөөрөө илэрхийлж байгаа билээ. Өчигдөр Говийн Их дархан цаазат газарт Нарансэвстэйн боомт нээхийг эсэргүүцсэн иргэний нийгэм, эрдэм судлаачид, орон нутгийн иргэдийг УИХ-ын дарга хүлээн авч уулзаж, тэдний байр суурийг сонсох үеэр Монголын Байгаль Орчны Иргэний Зөвлөлийн тэргүүн Г.Галтайхүү хүүхэд залуусын уран бүтээлийн дээжээс гардууллаа.
