Малын зах зээлийн дундаж үнийн 2024 оны 11 дүгээр сарын мэдээллийг 2023 оны мөн үеийнхтэй харьцуулахад:
Соёолон үрээний үнэ 1.2 сая төгрөг болж, 54.6 мянган төгрөгөөр,
Хязаалан гунан үхрийн үнэ 1.6 сая төгрөг болж, 166.8 мянган төгрөгөөр,
Эр хонины үнэ 240.8 мянган төгрөг болж, 28.8 мянган төгрөгөөр,
Эр ямааны үнэ 157.2 мянган төгрөг болж, 14.5 мянган төгрөгөөр нэмэгджээ.
Харин атны үнэ 1.5 сая төгрөг болж, 15.8 мянган төгрөгөөр буурсан байна
Малын үнийн мэдээнд хүнсний болон ашиг шим, уналга, эдэлгээний зориулалтаар худалдан борлуулсан малын үнийг хамруулдаг. Шилмэл омгийн мах, сүүний чиглэлийн, хурдны морь зэрэг өндөр үнээр борлуулсан малын үнийг тухайн мэдээнд хамруулахгүй гэж Үндэсний статистикийн хорооноос тайлбар хийжээ.
Үхрийн 2 метрээс дээш урттай шир 3.6 мянган төгрөг болж, өмнөх оны мөн үеийнхээс 2.1 мянган төгрөгөөр буурсан байна. Гэхдээ цагаан ноолуурын 1 кг-ын дундаж үнэ 105.0 мянган төгрөг болон 17.0 мянган төгрөгөөр нэмэгдсэн бол цагаан ноолуурын 1 кг-ын үнэ Дундговь аймагт хамгийн их 120.0 мянган төгрөг, Булган аймагт хамгийн бага 90.0 мянган төгрөгийн үнэтэй байгаа аж.
